ORANJESTAD (AAN): Den luna di juni linguista Mag. Ramon Todd Dandaré a traduci 5 poema di e buki Veinte poemas de amor y una canción desesperada di Pablo Neruda.
Ramon Todd Dandaré a bisa: "Mi a tuma e tribilidad di traduci nan na Papiamento, pa motibo di e hecho cu e luna aki di juni ta 100 aña cu e buki a sali publica na Chile."
E poemanan a keda presenta tanto na Spaño como na Papiamento na e Anochi di Poesia di tur fin di luna organisa pa Basha Foundation aki na Aruba.
Ta na su luga pa menciona cu Pablo Neruda ta un di e autornan mas reconoci na Latino America. E buki Veinte poemas de amor y una canción desesperada ta un di su bukinan mas famoso, cu sigur hopi amante di poesia a yega di lesa.
Siguientemente un relato cortico di su biografia traha door di Ramon Todd Dandaré.
Ricardo Eliecer Neftalí Reyes Basoalto tabata, ora el a nace, e nomber oficial di Pablo Neruda, cu despues a bira su nomber oficial.
El a nace dia 14 di juli 1904 (ayera tabata 120 aña pasa) na Parral, parti zuid di Chile, y el a muri dia 23 di september 1973 na Santiago de Chile, venena na hospital pa un medico, ordena door di e gobierno dictatorial di Augusto Pinochet.
Neruda a cuminsa skirbi poesia na edad di 10 aña, pero su tata no tabata di acuerdo, y p’esey el a cambia su nomber, na honor di e autor Checo Jan Neruda. El a bira un poeta reconoci como tal tempo e tabatin 13 aña y el a skirbi den diferente estilo: poema surealista, epica historico, manifiesto politico, un autobiografía Confieso que he vivido y poesia di amor pasiona, manera e poemanan den su di dos buki.
Na 1923 Neruda a publica su prome buki Crepusculario. Y el a publica su di dos buki Veinte poemas de amor y una canción desesperada na juni 1924, un buki inspira pa un amor infeliz.
E buki a bira un gran exito for di principio. Neruda a bira den curso di su bida un figura politico importante na Chile y el a haya Premio Nobel di Literatura na 1971.
Awe DIARIO ta publica e prome di 5 poema cu Ramon a traduci na Papiamento. Ta trata di Poema 12.
Sigur algo masha bunita pa lesa!
Durante e siman aki lo publica e resto di e poemanan cu ta: Poema 15, Poema 16, Poema 18 y Poema 20. Cu e publicacionnan aki DIARIO ta duna honor na e di 120 aniversario di nacemento di e gran poeta Chileno Pablo Neruda. Keda pendiente.
