Señora Shahayra Croes di DNM:
ORANJESTAD (AAN): Shoco ta un bestia protehi di gran importancia pa Aruba. Pa proteha e poblacion di shoco na Aruba, ta existi dos ley cu ta enfoca riba conservacion, respet, y responsabilidad pa proteha e shoco pa presente y pa futuro. Señora Shahayra Croes, vocero di Directie Natuur en Milieu (DNM) ta elabora riba esaki enfatisando tambe riba e consecuencianan di haci actonan contra shoco of neishi di shoco.
Señora Croes, a splica cu den caso ciudadanonan constata un neishi di shoco, por ehempel na luganan di construccion, por tuma contacto cu DNM pa registra e localidad di e neishi di shoco. Den e caso aki, mester laga e neishi keto y stop construccion pa e shoconan no spanta y bula bay laga nan neishi. DNM ta pidi pa ora cu cuminsa cu un construccion, pa tene cuenta cu shoconan ta traha neishi den seronan di santo, por lo tanto ta conseha pa tapa esaki cu un lona, y tapa tur tuberia pa asina evita cu nan ta scoge e luganan aki pa traha neishi.
Na momento cu DNM constata cu tin registracionnan, inspeccion ta bay na e localidad pa verifica cu tin un neishi eynan, y si ta un tereno publico, ta pone un aviso indicando kico mag y kico no mag di haci, segun e dos leynan ta describi, entre otro, no mag di mishi; no mag di mat’e; no mag di strob’e; no mag di destrui e area y e neishi; no mag di mishi cu e webo y yiunan. Y despues di esaki, inspeccion ta sigui monitorea e neishi di shoco te ora cu e shoconan dicidi cu nan ta bandona e localidad.
Señora Croes a enfatisa cu kibramento di e leynan aki y actua contra siguridad di e shoco y su neishi, ta resulta den boet. Pa registra un localidad di shoco, por tuma contact cu DNM via nan telefoon of via website dnmaruba.org of via nan pagina di Facebook.
