Lansamento di CTR21: Empoderando docentenan di Caribe pa mehora Educacion

ORANJESTAD (AAN):  E conferencia di apertura di e proyecto "Caribbean Teacher as a Researcher in the 21st Century" (CTR21)

a marca e cuminsamento di un proyecto di investigacion pa tres aña den scolnan basico na Saba, St. Eustatius, St. Maarten, Aruba, Bonaire y Corsou.       

            Miembronan di ekipo CTR21 a duna bon bini na e participantenan di un entrenamento pa coachnan, como tambe director di Instituto Pedagogico Arubano (IPA), Universidad di Kòrsou, Universidad di St. Marteen  y Universidad di Aruba.

            Siete orado inspirador a motiva publico, splicando e importancia di e investigacion colaborativo pa scolnan y educacion den e region. Lider di proyecto CTR21, Dr. Gregory Richardson, a presenta e obhetivo di e proyecto y su importancia pa educacion den Caribe Hulandes.        

            Dr. Gerard Baars, Director di Nationaal Regieorgaan Onderwijsonderzoek (NRO), a manda un mensahe di felicitacion via video, subrayando e importancia pa haci e resultadonan di e investigacion accesibel pa comunidad di region.

            Representantenan di varios institucion a enfatisa e balor di e colaboracion regional y e conocemento practico pa yuda mehora e calidad di educacion.

            Programador di CTR21, Melendy Neuman MSc, a presenta un poema titula “Problema den Practica” cu ta enfatisa e papel di e docente como pensado critico. Ademas, e participantenan di e conferencia a ricibi un buki guia titula Een onderzoekende houding, cu ta yuda promove un mentalidad di investigacion den e docentenan.  

            E conferencia a cera cu oradornan invita, Profesor Dr. Joana Duarte y Dr. Ton Klein, cu a realsa importancia di un mentalidad di investigacion y practica di enseñansa basa den evidencia.   E team organisado di CTR21 ta mas cu agradecido pa e sosten pa cu e cuater dia di training, cu ta pone e base pa un transformacion den educacion den Caribe.