ORANJESTAD (AAN)—Den ocacion di e lanzamento di e website nobo di IDEA, cu e meta di facilita informacion y conocemento na e comerciantenan estableci y esnan cu kier lanta un negoshi, señora Sue Ellen de Freitas-Sousa,
funcionario di Camara di Comercio y Industra (KvK) tambe a hiba palabra.
De Freitas-Sousa a menciona cu e tabata na haltura, pa un tempo caba, di e trayectoria di e website y sigur ta un iniciativa di aplaudi. El a bisa cu e ta hopi contento cu e lanzamento di e website aki.
El a splica cu e informacion ta central riba un pagina. Trahando hopi di cerca tambe di banda di KvK el a expresa cu hopi biaha nan ta biba experiencianan di cerca, y cu manera minister di economia a bisa, e empresario ta un experto den locual e ta haci pero e ta rekeri conocemento, informacion, y guia di otro aspectonan di e maneho di un negoshi.
Si e comerciante no tin esaki hopi biaha e por pone e negoshi riba un caminda menos bon, of cu e no ta obtene e meta desea cual, naturalmente, ta e exito di un negoshi.
Sue Ellen de Freitas-Sousa a reitera cu KvK ta aplaudi e iniciativa aki, y duna pabien na e Departamento di Idea, e Departamento di Asunto Economico, y ta spera cu Camara di Comercio sigui colabora manera semper, cu informacion manera nan a contribui cune, den e caso aki, y asina keda traha conhuntamente como stakeholders, tur cu e mesun meta cu ta sigui informa y stimula e empresario potencial, pues ta nan deber di aporta e guia y informacion disponible. Den nomber di e team y e directiva di Camara di Comercio y Industria, Sue Ellen de Freitas-Sousa a reitera palabranan di pabien na IDEA pa su website, y e ta spera cu e comerciantenan y tur interesa haci bon uso di esaki.
