Kiwanis Club of Palm Beach a reconoce e ‘Terrific Kids of the Year’

Durante aña di pandemia -  ORANJESTAD (AAN): Kiwanis Club of Palm Beach conhuntamente cu St. Dominicus College y St. Franciscus College,

recientemente a anuncia e “Terrific Kids of the Year” na e scolnan aki. E reconocemento aki ta e culminacion di e programa social yama “Terrific Kids” cu Kiwanis Club of Palm Beach ta sostene na e schoolnan menciona.

   E pandemia COVID-19 a haci cu e aña escolar aki tabata uno dificil pa ehecuta e programa. No obstante, ambos scol a logra di finalisa henter e programa independientemente. Tabata solamente recien na Juni cu e miembronan di Kiwanis por a bishita e scolnan atrobe pa acompaña e ultimo actividadnan. Pesey un palabra di elogio especialmente ta bay na e maestronan cu a guia e programa durante e temporada dificil aki.

   Kiwanis Terrific Kids ta un programa di reconocemento escolar cu ta promove desaroyo di balornan manera caracter personal, autoestima y perseverancia. E palabra “TERRIFIC” ta un abreviacion na Ingles cu ta consisti di e prome leternan di “Thoughtful, Enthusiastic, Respectful, Responsible, Inclusive, Friendly, Inquisitive and Capable”. Studiante nan den e programa ta traha cu nan maestro pa establece metanan pa mehora comportacion, contacto cu otro, presencia y/of trabao escolar. Terrific Kids ta un programa di Kiwanis International. Na Aruba, Kiwanis Club of Palm Beach ta patrocina e programa na e dos scolnan menciona y esaki ta encera sosten di diseño di e programa, sosten financiero, guia y supervision.

   Durante e aña escolar tin diferente reconocemento intermediario y na final di e programa, na luna di juni, ta reconoce e “Terrif Kids of the Year”. E alumnonan aki mester logra por lo menos 7 di e 8 letternan di e palabra “TERRIFIC” durante e aña. E celebracion ta encera anuncio di e ganadornan, otorgamento di e reconocemento y sacamento di potret. Despues tin un celebracion grandi cu cuminda y bebida caminda ta participa e alumnonan cu a participa, e maestronan y miembro di Kiwanis Palm Beach.  Na e ocacion aki e ganadornan ta ricibi nan certificado especial di “Terrific Kid of the Year”.

   Durante aña escolar 2020-2021 a participa un total di 265 mucha na St. Dominicus College y 192 na St. Franciscus College. Un gran pabien di parti di Kiwanis Club of Palm Beach ta bay na tur mucha cu a participa y e staf maestro cu a contribui. Un pabien especial ta bay na e 31 alumno di St. Dominicus College y e 26 alumno di St. Franciscus College cu a logra obtene e certificado maximo di “Terrific Kids of the Year” 2020-2021.

   Tambe e scolnan a scohe dos ‘TK Teachers of the Year’. E maestronan aki a resulta di ta pa St. Dominicus College: Señora Liza Maldonado-Oduber and Sr. Mario Lobo; y pa St. Franciscus College: Señora Souell Maduro y Señora Rosalinda Hayer. Finalmente un palabra di pabien ta bay na e cabesantenan di e schoolnan, respectivamente Señora Caroline Cardose (St. Dominicus College) y Señora Nadine Kirindongo (St. Franciscus College). Riba e potretnan aduntu por mira maestronan, alumnonan y miembronan di Kiwanis Club of Palm Beach na e celebracion final.