KEBA Botanicals ta cultiva futuro cu mushrooms local

Hoben empresario Kenny Balentin:

ORANJESTAD (AAN): Cu solamente 34 aña di edad, Kenny Balentin ta demostrando cu innovacion y perseverancia por habri porta nobo den sector agricola di Aruba. Su proyecto, KEBA Botanicals, ta enfoca riba cultivacion local di oyster mushrooms organico, un producto relativamente nobo pa mercado Arubiano. Den un laboratorio special adapta pa e proceso, ta cultiva oyster mushrooms di calidad halto destina principalmente pa hotel y restaurantnan. Den un entrevista cu DIARIO, señor Balentin ta splica cu cuidadosamente ta controla e condicionnan necesario pa garantisa calidad y consistencia. 

El a remarca cu e iniciativa no solamente ta ofrece un producto fresco y sostenibel, sino tambe ta contribui na diversificacion di agricultura local y reduccion di dependencia di importacion Aunke e empresa tin un empleado cu ta traha mita tempo, Balentin mes ta encarga cu gran parti di e trabounan diario, incluyendo entrega di producto na cliente.

Ademas di aporta na economia local, e proyecto di KEBA Botanicals ta enfoca riba sostenibilidad y agricultura responsabel. E mushrooms ta wordo cultiva cu metodonan cu ta tene cuenta cu medio ambiente y den un sistema cu ta minimalisa desperdicio. 

Oyster mushrooms ta un producto aprecia den gastronomia internacional pa su sabor, textura y balor nutricional. KEBA Botanicals ta enfoca riba mantene un produccion consistente y confiabel pa su clientenan, mientras cu ta promove e importancia di produccion local. Segun Balentin, e meta ta pa conberti KEBA Botanicals den un suplier principal pa sector hotelero y gastronomico di Aruba. 

El a agrega cu tur comienso di algo nobo, tin su desafionan, y un di e desafionan di KEBA Botanicals ta pa convence clientenan pa purba un producto local relativamente nobo of no mucho conoci na Aruba ainda. Sin embargo, e resultado nan ta hopi alentador. 

“Na principio no ta facil pa haya cliente dispuesto pa purba algo nobo, pero poco poco hende ta conoce e producto y ta aprecia su calidad,” Balentin a comenta.

Actualmente, KEBA Botanicals ta bende entre 40 y 50 kilo di mushrooms pa siman na diferente hotel y restaurantnan na Aruba, tur cosecha na momento ideal pa garantisa frescura y resultado culinario superior. 

KEBA Botanicals tin capacidad pa produci te 100 kilo pa siman, loke ta ofrece suficiente potencial pa sigui expande y atende mas cliente den futuro. Entre e bentahanan cu e empresa ta destaca tin e frescura superior compara cu mushrooms importa, entrega directo na cliente y disponibilidad constante durante henter e aña. 

Balentin ta mira futuro cu optimismo. E ta expresa confiansa cu a medida cu mas persona y establecimento conoce e beneficio di mushrooms local fresco, su negoshi lo sigui crece. 

“Mi tin fe cu e mercado lo sigui habri. Cada siman nos ta mira mas interes y mi ta kere cu nos tin hopi espacio pa sigui crece,” el a conclui. 

KEBA Botanicals ta cultiva futuro cu enfoke riba produccion local, di calidad y servicio directo, y ta un ehempel di con dedicacion y innovacion por contribui na diversificacion di economia Arubiano y promove produccion agricola local.