Juliana School Mavo cu proyecto innovativo ‘Youth Entrepreneurs 2022’

ORANJESTAD (AAN): Recientemente, e alumnonan di Ciclo Basico 2 a presenta e parti final di e proyecto ‘Youth Entrepreneurs 2022 – The Competition’.

E proyecto aki a wordo guia door di  Juffrouw Cindy Wernet, docente di Ingles na Juliana School MAVO, cu colaboracion di Juffrouw Sharleen Tromp y Meneer Giovanni Christiaans. Nan a logra prepara e gruponan pa haya cifra pa e materianan Ingles, Economie y Informatiekunde.

            Klas 2 di Juliana School MAVO, un total di 51 alumno, a traha riba e proyecto den grupo y e meta tabata encera inventa of imita un producto pa asina introduci nan negoshi y producto na e mercado di Aruba. Nan a siña traha un ‘Business Plan’ basico na Ingles, pensa un nomber pa nan compania y diseña un logo. Durante e Proyecto e alumnonan a ricibi bishita di e ex-alumnonan Sebastian, Valentina y Daniella Gomez, kende awendia ta empresario di Vadavas cu a conta nan trayectorio y a duna conseho y inspiracion pa pusha pa nan logra nan meta.

            Pa e anochi final tur 12 grupo a presenta nan pitch, uzando terminologia cu nan a siña como empresario nobo. Nan a pasa slides pa splica e logo, diferente funcion cu cada miembro di grupo tabatin den nan compania, costo pa traha e producto y pronostico di entrada despues di inversion.

            E presentacion final a tuma luga den Crystal Theater y a cuminsa 6:30 pm cu un mercado pafo di e sala, caminda e gruponan por a expone nan producto final. Publico presente por a cumpra e productonan cu e alumnonan a crea. Tabata tin, entre otro: body scrubs, yabero, armband, bela y tur esakinan traha door di e 12 gruponan. Tambe a expone otro producto cu no tabata na benta. Grupo B-safe e desplega nan locker y grupo Phone Ware a mustra e diferente maneranan con nan por personalisa kaft di telefon pa nan clientenan. 

            Pa 7:15 pm e evento paden a cuminsa cu e maestronan di ceremonia Nathan Zapata di klas 3C y Arleen Thiel di klas 3A. Cabesante di Juliana School, Juffrouw Paula Croes, a duna palabra di bonbini y e MC-nan a introduci e miembronan di hurado. Henter e cuerpo di hurado ta ex-alumno di Juliana School y awendia empresario cu experiencia: Radinka van Vuurden, Jinan Dirksz, Sharon Violenus, Edilianne Donker y Sebastian Gomez. E miembronan di hurado a ricibi muestra di e productonan di bolo miniatura, donuts, pasaboca di ijs y e otro inventonan cu tabata tin riba mercado.

            E anochi a culmina cu anuncio di e ganadornan. Na tercer luga e keda e grupo Key-Cycle, di alumno Elizabeth Koolman, Dayna Wever, Shayenn Raven, Jeanyl Sierra y Zayon Kelly di klas 2C. Di dos luga a bay pa Artistic Hands presenta pa Kianah Vrolijk, Jaythan Franken, Rebecca St. Fleur y Immilaine Maduro di klas 2C.

            E prome luga y ganado absoluto di ‘Youth Entrepreneurs 2022– The Competition’ a bira e grupo Island Body Scrub di alumno Julienne Jones, Hillary Cano, Valentina Pinzone, Tamara Goovard di klas 2B.

            Juliana School kier a gradici e alumnonan cu a briya y demostra cu nan tin e capacidad pa ta futuro empresario di Aruba. Un danki tambe na e mayornan pa apoya e proyecto aki y na cuerpo di hurado presente. Y sin lubida nos MC-nan Nathan y Arleen pa e bon trabou.

            E Proyecto aki no lo tabata posibel sin e ayudo di nan sponsornan.