ORANJESTAD (AAN): Mientras cu Raad van Advies a duna OK, toch ta keda cuesttiona e hecho cu Aruba no a aproba Ley 84 cu ta encera tratamento corecto pa cu Supplemental CBD.
Aruba a acepta solamente Ley 82 (Medicinal CBD), y tambe Ley 83 (Medicinal Cannabis).
Pero kico bo ta mira awor? Mas bien ta Supplemental CBD ta wordo usa pero den un bachi di Medicinal CBD.
Den un entrevista cu John Arends, kende ta produci Supplemental CBD na Hulanda, a splica cu den ultimo aña aki so como 25 compania na Europa a perde nan licencia di produci Supplemental CBD. Esey ta debi cu nan producto a wordo bendi na otro paisnan falsamente bao di bachi di ‘Medicinal CBD’.
Debi cu Aruba a keda sin vota pa Ley 84 (Supplemental CBD), e lo bay produci un efecto di domino. Esta cu companianan grandi cu tabata interesa pa bay den partnership cu esnan na Aruba, lo bay ripara cu e legislacion na e isla aki no ta adecuadamente prepara, e ora no ta duna companianan stranhero e interes mas di bin inverti riba di 20 miyon Euro den e industria aki na Aruba, unda no tin e leynan di CBD poni corectamente.
Manera ta conoci, ta e “Hefe di Inspectie di Medicina” a duna conseho na Ministro pa elimina Ley 84, esta e “Supplemental CBD”. Un decision cu lo perhudica Aruba sigur.
Por corda con Gobierno a indica cu e industria di CBD na Aruba lo yuda genera sumanan grandi pa cu otorgamento di licencia, etc., pa esnan cu ta bay cultiva. Ultimo por a nota cu no ta ni bay pidi mas pa licensia, pasobra ya “no tin nada mas pa ofrece mas”. Segun John Arends, pesey mes Aruba mester a prepara su leynan na e forma corecto cu ta favorable.
Den e mundo di Cannabis, bo tin di realiza cu esnan cu berdaderamente tin experiencia pa cultiva esaki, no ta un abogado of un comerciante cu kier inverti. Esnan cu experiencia ta esnan cu ta bin di baho mundo.
Tur caminda unda awor e industria di Cannabis ta florece, tin di corda cu e paisnan aki a traha cu esnan di baho mundo, pa (1) kita e parti di cultivo ilegal, y (2) haci e cultivo ey bira legal. Den un solo paso Gobiernonan a dal un golpi duro na mundo baho, pero alavez ta stimula economia.
John Arends a splica cu su compania Aruba CBD di Hulanda a yuda algun compania busca permiso pa start riba e isla, y nan a presenta na Gobierno di Aruba un “Economic Impact Study” cu ta pone detayadamente con grandi tereno mester ta pa cultivo, cuanto placa por produci, y a hasta ofrece pa bin cu un Co-op cu 14 mil accion (‘share’) cu por ta disponible pa Arubianonan mes, na prijs di como 3.500 Florin, y asina lo a logra crea 49 miyon Florin na fondo.
Y e lo a draai si acaso e cultivo a start. John Arends a splica cu e tin un MoU den su poder, pa cumpra 10 ton pa aña pa exporta pa companianan Ingles. Su intencion tabata pa pasa e MoU aki pa e co-op pa asina yuda Aruba cu e turn-around aki.
Esey tabata e intencion pa bin cu un compania co-op, y unico cos cu a pidi pa 51% di e accionnan ta keda den man di Arubianonan.
Pero Departamento di Asuntonan Economico a mustra cu un co-op lo no wordo acepta tampoco door di Banco Central, como cu e co-op lo por wordo considera un riesgo pa labamento di placa.
Riba e potret por mira John Arends cu e producto “Aruba CBD” cu pa algun tempo ta wordo fabrica na Hulanda y bendi na varios pais como Supplemental CBD.
