ORANJESTAD (AAN): Awe Diahuebs for di 5:30 pm te cu 8:30 pm, tin un chens unico pa studiantenan local, bay check ki posibilidad tin pa sigui nan estudio na Universidad di Aruba.
E asina yama ‘Information Night’ aki lo ta consisti di diferente ‘Information Booth’ poni riba campus di Universidad, y tambe lo tin sesionnan informativo cu ta cuminza for di 6:00 pm caba.
Di e forma ey, Universidad di Aruba ta habri su portanan y tur hende ta bon bini pa bay mira kico nan por brinda eynan pa cu Bachelor Studies, y tambe diferente oportunidad cu tin na Aruba.
Estudio di Ley tambe ta wordo duna, y pa bo obtene bo grado di Bachelor of Law e ta algo cu Universidad di Aruba ta traha duro pa bo logra esey, y abo como studiante mester di e actitud corecto tambe!
Kico mester haci anto? Pesey riba Diahuebs anochi, esnan cu bishita e ‘Information Night’ lo topa cu e studiante Jennessy Donata, kende lo duna informacion clave riba esaki, y alavez papia di su experiencia na Universidad di Aruba.
Jennessy ta studiando ley actualmente, pero e ta un studiante part-time. Aworaki e ta studiando su di tercer aña eynan.
Segun Jennessy, el a obtene su HAVO Diploma cu 18 aña di edad. Como cu e ta un mama hoben, el a escoge pa bay traha pa asina por cria su famia. Pero semper el a keda cu e deseo di bay studia ley. Sinembargo par di tempo pasa el a cuminza check e asunto, y a percura pa finaliza su VWO, y despues aplica pa cuminza na e Facultad di Ley di Universidad, y el a percura pa esaki bira realidad.
E ta hopi satisfecho cu Universidad ta dun’e e oportunidad di haci e estudio aki na Aruba mes! Den e tres añanan mes aki caba, e ta notando un cambio grandi na dje mes. Esaki ta un indicacion cu por tin mas studiante eyfo cu tambe lo por tuma e pasonan aki.
E ta mama, ta traha, y tin su responsabilidadnan, pero e estudio part-time por wordo logra. “Bo por hacie,” Jennessy a bisa. “Pues tuma e pasonan y tribi di haci algo pa desaroya bo mes, y tambe bo tin chens di sigui loke realmente bo kier haci.”
El a bisa cu pasenshi ta hunga un rol grandi aki, y tambe esnan cu ta rond di bo, cu ta yuda encurashabo pa bo sigui cu bo estudio. Y tambe bo tin di kere den bo mes, pasobra hopi biaha nos ta pensa cu “nos no por”. No! Djis pensa cu “nos por” y bo tin di tuma e prome paso y haci’e consistentemente.
