ORANJESTAD (AAN): Awe Diahuebs for di 5:30 pm te cu 8:30 pm, tin un chens unico pa studiantenan local, bay check ki posibilidad tin pa sigui nan estudio na Universidad di Aruba.
E asina yama ‘Information Night’ aki lo ta consisti di diferente ‘Information Booth’ poni riba e tereno, y tambe lo tin sesionnan informativo cu ta cuminza for di 6:00 pm caba.
Charisse Hoen-Daly a indica cu Universidad di Aruba ta habri su portanan y tur hende ta bon bini pa bay mira kico nan por brinda eynan pa cu Bachelor Studies, y tambe diferente oportunidad cu tin na Aruba.
Segun Hoen-Daly, kende ta Relacionista Publico y Coordinadora, ora cu nan di Universidad ta bishita scolnan na Aruba pa duna informacion, nan ta bin topa cu un situacion cu mayoria di e alumnonan ta trahando plan pa bay sigui un estudio den exterior. Pero e alumno no sa, si tanto personalmente- y financieramente esey ta alcanzable, y tampoco kico exacto nan estudio lo consisti.
Pa tal motibo, ta vale la pena pa nan sa, cu na Universidad di Aruba tin 7 programa di estudio riba e isla mes! Nan a bin nota ultimo temponan cu e “Information Night” aki ta wordo bon bishita.
Pues e conseho di Charisse Hoen-Daly na alumnonan na Aruba, ta pa nan haya informacion di antemano pa sa cual ta e estudionan cu por ser haci riba e isla mes, prome cu bo subi un avion y trata na studia esey den exterior.
En general, Universidad di Aruba ta costumbra di mira cu tin hopi interes localmente pa e estudionan ofreci aki.
Diahuebs atardi for di 5:30 pm e portanan ta habri, y nan ta spera cu studiantenan lo bin cu nan amigonan, cu nan mayornan, y usa e chens unico aki pa haya informacion, papia cu studiantenan di Universidad, y cera conoci encuanto e estudio.
Tin docentenan internacional na Universidad, y corda cu studiantenan aki tambe ta haya oportunidad pa bay den exterior. Corda cu pa esnan cu ta trahando, Universidad di Aruba ta ofrece ‘deeltijdstudie’ tambe.
