Jacques Odryzynski nombra como Consul Honorario di Francia pa Aruba

A despedi di Sr. Mongellaz despues di 23 aña den funcion

ORANJESTAD (AAN): Recientemente un recepcion a ser teni na Surfside Marina na Oranjestad, organiza pa e Consul-General di Francia staciona na Amsterdam, esta señora Catherine Feuillet.

   E recepcion a ser teni pa honra señor Christian Mongellaz, kende tabata e Consul Honorario di Francia na Aruba, pero cu awor a finaliza cu e mision aki.

   Na e recepcion por a mira e.o. Luis Perez kende ta President di Asociacion di Consuladonan na Aruba, y Alisha Williams encarga cu Asuntonan Consular na Aruba.

   E trabao di Mongellaz a cuminza na aña 2001 na Aruba, y awor despues di a sirbi pa 23 aña e ta haya cu e momento a yega pa pasa e baston over na un otro persona pa fungi como Consul Honorario, y kende lo wordo introduci door di Consul General di Francia.

    Mongellaz a gradici esnan di e Asociacion di Consuladonan na Aruba pa e tempo cu el a traha cu nan, y e trabao di tur e añanan ey a pone nan cera un bon fraternidad cu otro.  El a gradici tur instancia di Gobierno pa e apoyo cu el a ricibi.

   Como Consul Honorario, e mision a pone conoce hopi hende y fuera di a conoce, a pasa den hopi prueba, principalmente esun tabata durante pandemia di Covid-19, y cu ta cu pasenshi y dedicacion a logra cumpli cu su deber.

   Mongellaz ademas na final a manda mensahe di bon deseo pa su sucesor, cu tur bon palabra pa e tin hopi sabiduria durante su mision nobo como Consul Honorario.

   Consul-General señora Catherine Feuillet, a splica di ta contento di ta na Aruba pasobra tabata un momento emocional cu ta trece tur hunto.  E ta un momento pa efectivamente bisa masha danki y pa duna gradicimento na Sr. Mongellaz pa e trabao cu el a desplega.   El a keda impresiona pa e bon servicio, y e bon contacto cu Sr. Mongellaz tabatin cu autoridadnan na Aruba. 

   El a divulga cu sr. Mongellaz a bin Aruba pa un motibo profesional pa traha den horeca.  Pero el a keda Aruba pa e mihor motibo cu bo por a pensa.  A apoy'e durante momentonan fastioso caminda hendenan di Consul den marduga ta yama y kite di otro trabao.  A gradici tambe e pareha di Sr. Mongellaz pa su pasenshi.

   Despues di esey, sra. Feuillet a anuncia cu nan a escoge Jacques Odryzynski pa bira e Consul Honorario nobo di Francia pa Aruba.  A haci esaki na nomber di president di Francia, via di Ministerio di Exteriores na Jacques Odryzynski pa e haya e titulo y pa sirbi na Aruba.

   Esaki ta e mision nobo cu Jacques ta haci, y a haci entrega di e certificacion conteniendo su nombramento.  Tur invitado e anochi aki a pasa pa gradici sr. Mongellaz pa su servicio, y despues felicita sr. Odryzynski cu su nombramento como Consul Honorario di Francia pa Aruba.