Investigacion cu calco den Lac Bay pa yuda salba e animal

Cada calco tin un tag cu transmisor

ORANJESTAD (AAN): Informacion procedente di Bonaire ta indica cu e proyecto piloto Conquer the Future a wordo completa recientemente na Bonaire. E meta di e proyecto aki tabata pa investiga si ta posibel pa yuda restaura e poblashon di calco door di pone calco chikito cria den lama.

   Durante e proyecto, a pone mas o menos 150 calco hubenil den e areanan di yerba di laman na Lac Bay. Prome cu esaki, e calco a haya un tag cu transmisor pa monitor nan tur, hasta si e calco ta sconde den santo of den e yerba.

   Pa un aña largo, investigadornan a colecta data tocante nan crecimento, sobrevivencia y movimento. Tur bestia a crece bon, loke ta indica cu tin suficiente cuminda. Algun calco a keda cerca di e area caminda a pone e calco. Otro calco a move te 32 meter pa siman, specialmente ora tin menos cuminda of ora e coriente di laman tabata fuerte.

   Sobrevivencia di e calco cria tabata bon, pero investigacion a mustra cu mester a libera e bestianan cu mas espacio entre nan. Si nan ta hopi cerca di otro, predadornan por cue varios calco mesora. Tambe a sali na cla cu a pesar di e prohibicion, algun hende a saca calco for di laman. Esaki ta un gran menaza pa e exito di restauracion.

   Pa futuro proyectonan grandi pa pone calco cria den laman, ta importante cu hende ta sigui e reglanan di pesca. Tambe ta necesario pa sigui duna informacion tocante e rol di e calco den naturalesa y e importancia pa proteh’e. E calco no ta solamente importante pa bida marino, pero tambe tin un balor grandi cultural pa e islanan.

   Durante e 18 luna cu a pasa, investigadonan, studiantenan y organizashonnan di naturalesa a traha hunto riba e proyecto aki. STINAPA Bonaire a dirigi e proyecto, cu conseho tecnico di Carmabi. E calco hubenil a wordo cria den e Queen Conch Hatchery na Sea Aquarium di Curaçao. A transporta e bestianan den boto for di Curaçao pa Bonaire cu sosten di cooperativa FCUP. Piscabon a yuda cu e haula den lama caminda e calco por a adapta nan e medioambiente prome cu investigadonan a libera nan. E proyecto a ser financia pa Wereld Natuur Fonds y Seacology.

   E potretnan aki pa cortesia di Michiel van Nierop.