Mester atende cu e ley cu ta regla pago di personal di Gobierno --- *Baha salario cu 12.6 porciento ta baha compra na comercio local --- *Resultado menos salario den tempo inflacion sumamente peligroso
ORANJESTAD (AAN) — “E situacion mundial cu a desaroya na forma inespera, a deshaci di e stabilisacion di mundo despues di e atake feroz di Covid-19 riba economia mundial. E ta exigi revision di plannan existente si un estudio nobo ta haci esaki necesario.”
Informacion concreto cu DIARIO a ricibi di informantenan cu a indica cu situacion mundial a cambia a base di e crisis di Ukraine, cu ta parce di ta inspiracion pa mas confrontacion mundial na otro parti di mundo.
Diferente topico sumamente importante mester haya atencion urgente na e momentonan aki y uno di nan ta sigur, e pregunta si mester continua cu e plannan pa baha salario di personal di gobierno y empresanan di Gobierno.
Na tur momento DIARIO a compara e aparato gubernamental cu un empresa grandi cu mester traha a base di su entrada.
E entrada di Gobierno di Aruba ta depende di e entrada di comercio di Aruba, cu na forma directo mester cumpli cu su pagonan na Gobierno y na forma indirecto mester percura pa trahadornan tin placa pa paga belasting, AZV y tur loke mester pa nan por biba.
Inflacion mundial basa riba e spiral di aumento di prijs provoca pa peytroleo pero tambe e gastonan pa sigui haci negoshi den e instabilidad mundial, a haci bida mucho mas caro pa e ciudadano, cu diariamente ta wordo confronta cu prijsnan mas halto.
E aumento di prijs aki ta debi na gran parti directamente of indirectamente na e prijs di petroleo, cu ta subi tur prijs sigur na un pais cu ta depende completamente di importacion.
Ora papia di importacion na Aruba, no solamente ta papia di producto, pero di importacion di clientenan cu ta gasta placa den comercio na Aruba y asina ta alimenta economia local.
Importacion di cliente, turista, pa e sector di turismo, ta nifica entrada di divisa, placa stranhero cu Aruba mester pa mantene su Florin a base di su reserva di divisa cu ta wordo maneha dor di Banco Central.
Pa haci compra den exterior y asina por importa produco cu ta pone na benta na Aruba, Comercio local mester di placa stranhero tanto pa e articulonan mes como pa servicionan cu e mester paga cu placa stranhero.
Mientras prijs mundial ta subi, prijs local ta subi y mester di cumprador cu e placa necesario pa haci compra na Aruba y asina alimenta comercio local cu ta base di economia local.
Informantenan a mustra cu na e momento cu Gobierno baha e salarionan di personal na e momentonan aki, Gobierno directamente ta corta e placa cu su personal ta gasta na cuminda y na tur otro gasto comercial manera vivienda, cuminda, transportacion, awa, electricidad y asina por sigui.
Esaki ta nifica cu e circulacion di placa na Aruba ta bay atras sigur si tene na consideracion cu trahadornan di Gobierno y empresanan cu menos oportunidad pa stop di existi den tempo malo, ta clientenan cu mas stabilidad pa comercio.
Segun informantenan e momento a yega na tuma pasonan diferente.
Kico e situacion di guera lo nifica e siman aki mes pa henter mundo, no ta conoci. E situacion ta incontrolabel y por tin resultado ainda riba turismo pero tambe e conexionnan comercial internacional di Aruba.
Baha entrada di personal di Gobierno na e momentonan aki, mester wordo studia den e situacion nobo y si ta necesario revisa, segun informantenan cu ta papia awor di revision di e gastonan di Gobierno.
Informantenan ta indica cu na e momento aki, den cooperacion cu Reino, gremionan y sigur Parlamento, Gobierno mester revisa e plannan pa baha gasto y trata na acelera entrada di proyectonan grandi cu ta produci placa pa e pais.
“Un etapa sumamente exigente pa gobernacion a presenta su mes. Reino mester duna Aruba e espacio pa ahusta na e situacion mundial,” a wordo trece dilanti dor informantenan clave.
“Cuminza controla black market, cu ta perhudica Gobierno y Comercio. Sinta na mesa awor pa yega na un cambio den e ley cu ta dicidi riba derechonan di e trahadornan di Gobierno (Lands Materieel Ambtenarenrecht) y ta yena cu primanan cu no ta existi den sector comercial y negosha con cambionan ta drenta na vigor y un fase di transicion,” informantenan experto a trece dilanti.
