Interesante Expo “Caribbean” y “Southern Dialogs” tumando lugar den Talk of The Town

ORANJESTAD (AAN) -- Den un entrevista cu DIARIO, señora Eva Gonzalez, coordinador di Aruba Photo Room, a elabora tocante e exposicion “Caribbean”, y ademas “Southern Dialogs” cu ta tumando lugar na Talk of The Town, y cu ta keda habri te cu 20 Januari 2022.

Gonzalez a splica cu, manera semper, esaki ta den colaboracion di e Museo de Arte de Las Americas, situa na Washington DC, di parti di e Organizacion di Estadonan Americano (OES).

El a duna di conoce cu den e oportunidad aki nan a dicidi di trece artistanan local, y a crea un grupo di cuater artista: dos di Aruba cu ta Damilice Mansur y Fernando Vermeer; di Colombia Darleen Quiros y di Venezuela Rafael Barragan.

“Nan a wordo invita pa haci dialogo entre su propio obranan y pa nan ta curator di e exhibicion, pa nos por transforma e proceso curatorial cu, usualmente, ta vertical y e curator ta dicidi. Den e caso aki a invita e artista pa dicidi cual ta e imagennan cu ta bay den dialogo. Tur e imagennan den e galeria ta wordo presenta den par”, Eva Gonzalez a splica.

Di otro banda, Gonzalez a indica, tin e “Southern Dialogo” presenta pa diez artista cu diez obra. Nan tur ta di Argentina y Chile. E ora ey tin un combinacion di loke e artista por aporta, tanto esnan di Caribe como esnan di e parti Zuid di e Continente. Eva  Gonzalez a splica cu esaki ta un manera di mustra arte sostenible. E obranan cu por observa den e exposicion aki no ta pa bende; e publico por mishi cu nan, y si un di e obranan ta haya un daño, nada no ta pasa.

E exposicion aki ta cera na Januari 20, y di eynan muy probablemente nan ta bay otro festival di arte y fotografia, pues nan ta wordo uza atrobe.

Di e manera aki e ta bira sostenible, pasobra no tin hopi volumen, nan ta lora drenta den un tubo chikito mas facil pa transporta.