Instructornan di landamento porfin a mira adelanto

Parlamentario Tromp-Lee (MEP):

ORANJESTAD (AAN):  Desde dia 7 di October 2020 cu mi reuni cu 2 representante di e grupo di Instructornan di Landamento mi a bin ta pidi atencion di Gobierno pa e grupo meta aki. Nan a acerca mi persona e tempo ey pa plantea nan preocupacion y alabes duna splicacion di e situacion cu nan tabata aden. Tabata trata di un grupo di alrededor di 20 trahador cu desde 2 di september 2020 tabata bibando den inseguridad y a acerca mi como Parlamentario pa yudanan haya claridad y transparencia for di Gobierno.

            Durante e reunion aki diferente punto a keda trata e.o.,: nan rechtspositie (contract, nombracion fiho, plan nobo/losse uurtjes, salario), ‘bezuinigingsronde’ di gobierno, Programa Landamento Escolar: diferente investigacion y intencion pa cambio di maneho di parti di e ex-minister di Enseñansa sr. Lampe. A base di e reunion aki y tur documento ricibi for di e tempo ey mi a para pa e grupo aki y pa e Proyecto Landamento Escolar. Un Proyecto cu a demostra di ta necesario y cu pa sigur 30 aña a keda realisa exitosamente. Un proyecto cu ta asina importante mirando cu nos ta un isla, rondona pa lamanan blauw bunita y caminda nos mester percura pa tur mucha por sa defende nan mes den lama of pool.

            Na su salida como Minister ainda sr. Lampe a crea un situacion hopi fastioso pa cu e salario di e Instructornan di Landamento y no a percura pa e fondonan necesario pa e proyecto por a inicia na comienso di e aña escolar 2021-2022. Algo cu mi a lamenta masha hopi mes. Un di e prome puntonan cu mi a trata cu Minister Endy Croes ora el a bira minister tabata e situacion di e Instructornan di Landamento y e necesidad pa percura pa e lesnan por start pa e aña escolar cu a pasa y tambe encuanto di nan rechtspositie. Awe 31 di augustus 2022 nos por mira un adelanto pa loke ta trata nan rechtspositie. Awe 19 instructor a firma un contract pa 5 aña caminda ta dunanan mas seguridad, nan a firma y ricibi un copia di dicho contract (desde 2009 nan no a haya un contract) y sigur awor lo tin menos preocupacion cada aña cu scol ta bay sera pa loke ta trata nan trabou. Mi ta desea un pabien na cada un di nan.

            Finalisando mi ta tin cu bisa cu mi ta contento cu Minister Endy Croes a sa di logra esaki, mescos cu a logra habri e programa na inicio di aña escolar 2021-2022, den un corto tempo. Dunando asina atencion na un grupo cu pa hopi aña a keda neglisha y cu a pasa den diferente incertidumbre. Un grupo cu tin na nan encargo un tarea asina importante y necesario. Pabien un biaha mas na cada instructor cu a keda lucha pa nan derecho pero mas cu tur cu ta pone e siguridad di nos muchanan como un prioridad.