Inicio di Carnaval 70 ta start sali awe oficialmente

== E temporada di carnaval ta cuminza awe 11-11 y manera  custumber y tradicion DIARIO lo tin su seccion di Carnaval un biaha mas pa informa tur su lectornan di e actividadnan cu lo bay tin y cubri lo maximo tur e eventonan di carnaval..

For di awe caba DIARIO ta desea tur hende un feliz temporada di carnaval y pa un y tur duna un man pa asina nos por celebra carnaval 70 en grande. Pa esnan cu kier publica nan informacionnan di carnaval, por manda esaki na Cette adresse e-mail est protégée contre les robots spammeurs. Vous devez activer le JavaScript pour la visualiser. of WhatsApp 5615325.

BAUTIZO JINGLE CARNAVAL

=   Na RBC Sasaki pa  11’or y mainta, na 11 minuut y 11 seconde lo lanza e jingle pa carnaval 70. Esaki sigur ta un tradicion cu e pueblo ta custumbra cu ne y caminda e jingle ta duna e ritmo y ambiente pa e celebracion di carnaval.  Sr. van Ommeren ta invita tur carnavalista pa ta presente pa e apertura oficial pa asina hunto cuminza celebra pa loque ta bay bira carnaval 70.

TREKMENTO LOT GRUPONAN

=  Ayera na Bonchincha Container Yard a tuma lugar trekmento di lot pa e secuencia di paradanan. Tabata tin animacion di Shine Music, N’Fusion, Musical Time , Dj Bang Daddy y Dj Sky.  DIARIO lo busca e secuencia di gruponan pa cada parada pa asina informa su lectornan.

CELEBRACION AWE NOCHI

= E apertura di carnaval ta sigui awenochi cu un happening den Promenade na S.N. Por a compronde cu parti di e caya principal ta wordo cera pa asina por pone lugarnan di bende cuminda, bende articulonan, lo tin tentnan cu Dj’s y lo bay tin un escenario principal riba e rotonde. E anochi aki lo tin presentacion di e bandanan Impak, Youth Xtreme, Tsunami, Buleria y Robert y su Solo Banda Show. Lo tin varios cantante tambe cu lo acompaña e bandanan aki.

CARNAVAL 70 DEDICA NA SAC

= Sr. van Ommeren durante un conferencia di prensa a bisa cu Carnaval 70 lo wordo dedica na Stichting Arubaanse Carnaval SAC. E dedicacion ta bay na nomber di tur miembro, pero nan no por invita tur, pero lo dedique special na e 11 miembronan cu tabata den ultimo directiva di SMAC.

Na final Sr. van Ommeren a pidi pa henter pueblo di Aruba pa join SMAC den e prome eventonan carnavalesco awe y tambe na tur e otronan cu lo sigi entrante 2024  pa asina haci carnaval 70 uno grandi un biaha mas.

PRE-FINALS CAISO Y SOCA

= Hayando reaccionnan den pueblo por bisa cu e 4 anochinan di Prefinals di Caiso y Roadmarch 2024 a bay sublime.  E 4 anochinan aki a conta cu varios tremendo cancion den Groovy Roadmarch, Power Roadmarch y Caiso. E aña aki tambe tin varios rookie cu a bin aporta na e evento aki y sigur tin di nan a wordo hopi gusta pa ta den final.

E prome anochi Sra. Edwina Angela di Stichting Musica a gradici tur esnan cu a support nan durante nan añanan di existencia y a bisa cu “Cada aña simplemente nan ta dal un stap dilanti, y di cosnan cu nan a bay bon nan ta siña. Pero mas cu tur cos nos ta mira cu e musica contagioso aki ta dominando nos isla cada dia un tiki mas”. For di awor caba exito na esnan cu cay den clasificacion.  

Mester bisa cu esun cu a haya masha hopi comentario mes riba medianan social ta Pastoor Jairo cu a sorpresa tur hende ora cu e tambe a participa como cantante. E cancion a dal duro y mester bisa cu sigur e ta uno pegahoso y sigur lo bay rezona basta durante e temporada di carnaval. E bon iniciativa tambe ta di e Pre finalnan ta cu hopi media a bay live streaming pa esnan cu ta na cas. Esaki tabata un bon idea pa esnan cu no por a yega na The Venue pa apoya nan cantantenan favorito personalmente por a mira nan presentacion live. E final di Caiso y Soca Monarch lo tuma lugar dia 26 di Januari. Adhunto tin algun foto di  e anochinan di pre final.

CALENDER CARNAVAL

= Adhunto tambe por haya e programa di carnaval 70 pa aña 2024, caminda tin basta actividad pa e temporada di carnaval cu ta di 6 Januari pa 12 di Februari 2024. Den e siguiente edicionnan DIARIO lo sigui informa mas di e eventonan tanto oficial riba programa, como tambe esnan cu lo bay tin durante e temporada ey.

REINA

= Por a compronde cu ya varios Reina ta trahando basta duro pa nan participacion na e eleccion final di reinanan. For di aña pasa tin di nan a tene varios evento y ta bay tene mas,  pa asina recauda fondo. Na tur, hopi exito den nan reinado y cu nan por logra pa participa den e gran final di eleccionnan di reina tanto Infantil, juvenil como grandi.