Ministro Geoffrey Wever:
ORANJESTAD (AAN): Minister di Finansa, Asunto Economico y Sector Primario, mr. Geoffrey Wever, a reuni cu presidente y secretaris di Huurcommissie siman pasa, na unda cu a presenta y discuti e jaarverslag 2025.
Huurcommissie ta e instancia cu ta duna permiso pa un verhuurder por termina un contrato di huur y riba peticion ta determina e prijs di huur pa casnan cu un balor di mercado te cu 150.000 Florin, asegurando cu procesonan aki di huur ta transparente, consistente y conforme ley. Huurcommissie ta hunga un rol clave pa fortalecee confianza y stabilidad den mercado di huur na Aruba.
E obhetivo di Minister Wever cu a restructura Huurcommissie desde 2021, tabata pa traha na un manera consistente riba fortalecemento di e proceso interno, claridad den proceduranan y mehoracion di e organo independiente. E esfuerso aki a resulta den un Huurcommissie cu awor ta opera di manera mas structura, profesional, eficiente y cu un base solido pa sigui crea un impacto positivo pa comunidad di Aruba.
Un desaroyo importante den e periodo aki ta cu e atraso cu tabata existi den tratamento di casonan a wordo elimina, resultando den un Huurcommissie cu awo ta completamente ‘up to date’. Esaki ta permiti cu casonan ta wordo trata na tempo y cu beschikkingen ta bin na tempo, fortaleciendo e eficiencia y confiabilidad di e proceso.
E progreso cu a logra y e impacto di e reorganizacion cu Minister Wever a inicia, ta refleha den e resultado actual. Den 2025, e Huurcommissie a trata un total di 264 caso di terminacion di contrato di huur y 33 caso di determinacion di prijs di huur. E cantidad di peticionnan ta mustra stabilidad den e cantidad di peticionnan compara cu añanan anterior. E organizacion di reunionnan y e proceso di decision a wordo optimisa, resultando den un tratamiento mas fluido di caso nan.
E resultadonan ta mustra cu un gran parti di e caso nan a wordo trata y resolvi, reflehando un proceso di evaluacion serio y un sistema cu ta funciona cu mas consistencia y profesionalismo.
Minister Wever a enfatisa cu e desaroyo di e Huurcommissie ta forma parti di un vision mas amplio pa fortifica institucionnan y mehora e servicio cu por ofrece na comunidad.
E mandatorio kier felicita y gradici e voorzitter di Huurcommissiemr. Monica Kock, Secretaris mr. Marlee Lacle, demas miembronan di Huurcommissie y e funcionarionan di Servicio na Defensa di Consumidor (SEDECO) pa nan esfuerso y compromiso pa sigui traha pa optimisa su funcionamiento pa por brinda e mihor apoyo na comunidad di Aruba. E progreso cu nos ta mira awe ta resultado directo di nan trabao duro y dedicacion.
