JOIA by Iberostar tin un Departamento di 3R
ORANJESTAD (AAN): Diamars mainta, DIARIO tabata presente na JOIA by Iberostar pa asina mira con e Resort aki, specialmente e area di cushina ta haciendo uzo di Inteligencia Artificial (A.I.) pa asina e compania reduci desperdicio, evita cumpra demasiado cuminda, y na final spaar hopi placa.
Na yegada, DIARIO a wordo ricibi door di Ghislaine de Windt Kemmerling, kende hunto cu Chef Ludwich Samson, Jareth Vermeulen, y Stefany a presenta na un forma orguyoso, con nan ta haciendo e propiedad nobo aki bira aun mas sostenibel, door di educa nan propio empleadonan pa sigui riba e trend mundial di 3R, esta ‘Reduce, Reuse, Recycle’.
Pesey mes tur rond riba tereno di e Resort, bo ta haya bakinan di desperdicio cu 3 tapadera nan dilanti.
JOIA by Iberostar ta e unico hotel cu tin un ‘3R Department’, y nan unico meta ta pa maneha desperdicio, y cu esaki ta pone enfasis riba percura pa tur desperdicio keda separa. E bakinan mes tin 3 diferente tapadera, pues bo tin ‘desperdicio organico’. Tur loke wordo benta aki den, ta wordo dirigi na un ‘Compost Alliance’ di cual e resort ta forma parti di dje. Nan ta percura pues pa nada organico bay pa Dump. Pero hopi resto di cuminda ta wordo canaliza y ta ser hiba pa Sherman Leest di Leest Farm pa e porconan come.
Ademas di e tapadera di desperdicio organico, tin tapadera di ‘desperdicio general’ di cual tur cos ta bay pa Ecotech, y tapadera di ‘reciclahe’ cu ta pa recycle bleki di aluminium cu Daltra, y plastic ta bay pa un compania nobo cu ta crush tur material di plastic, pa hacie esaki casi bira bek santo, cu ta wordo uza despues pa sandblasting.
Tambe tin carbon cu na final di uza nan den restaurantnan na Iberostar, ta wordo duna na Aruba Garden pa asina haci esaki den nan tera di gordura pa planta mata aden. Nan ta duna tambe resto di koffie, y tambe casca di webo, cu ta haci compost cu nan den hardin.
E bakinan aki cu 3 tapadera bo ta haya nan tambe den cambernan di JOIA Aruba, y e meta ta pa concientiza tur hende riba e importancia di uzo di 3R pa por haci e resort keda mas neutral y sostenibel den reduccion di desperdicio.
Den otro articulo por lesa riba e sistema di A.I. cu nan ta uzando den Cushinanan pa asina reduci e cantidad di desperdicio cu alavez ta yuda e compania spaar placa.
Riba e potret por mira Jareth hunto cu Stefany ta mustrando e bakinan special di desperdicio cu tin tur rond di e Hotel.
