Hospital ta haci intervencion cardiovascular pa cinco aña caba

Como 3.000 pashent di curason a haya tratamento

ORANJESTAD (AAN): Cinco aña pasa, pa ta exacto 9 di april 2018 a cuminsa cu intervencion cardiovascular na Horacio Oduber Hospital (HOH). Por mira back na un proyecto cu a resulta sumamente exitoso pa comunidad di Aruba y alavez a yuda baha gastonan medico durante e proceso. 

   “E motibo principal pa cuminsa cu intervencion cardiovascular na Aruba na prome instante tabata pa trata pashentnan cu ta haya un ataca di curason”, asina cardiologo dr. Casper Laclé ta conta. Anteriormente tabata manda nan den exterior cu Air Ambulance y despues di 10 pa 12 ora nan ta yega na e centro caminda basicamente hopi biaha ta laat. Awendia ta brinda e servicio local, pues for di e momento cu e pashent haya un ataca y yega departamento di emergencia ta logra pa habri e ader den menos di 90 minuut.

   Horacio Oduber Hospital a inaugura na April 2018 un compleho ultra moderno na unda a introduci e servicio completamente nobo pa Aruba cu ta intervencion cardiovascular y servicionan adicional cu aparatonan di e tecnologia super moderno. Intervencion cardiovascular ta ensera, tratamento di e arterianan coronario por medio di angioplastia na unda ta haci uzo di ballonnan y ta implanta stent pa mantene e arteriacoronaria cu ta afecta habri. Dos interventiecardioloog hunto cu un team di laborant/verpleegkundigenan specialisa den interventiecardiologie ta brinda e tratamento medico aki den un compleho moderno na HOH. 

   “Nos ta hopi orguyoso cu den e cinco añanan aki a trata alrededor di tres mil pashent di cual dos mil pashent a ricibi e tratamento di angioplastia,” dr. Robert Dennert, cardiologo na HOH a menciona. Alavez casi 300 pashent cu a sufri di un atake di curason agudo a worde trata dentro di 90 minuut despues cu nan a presenta na e departamento di emergencia na HOH. Di e forma aki ta cumpli cu standardnan internacional cual ta pa scapa mas hopi musculo di curason cu ta posibel.

   E plannan cu tin pa futuro ta pa mehora e relacion den Caribe. For di 2020 HOH ta atende tambe pashentnan di Bonaire cu haya ataca di curason. Mirando e exito di e programa di intervencion cardiovascular tin plan pa sigui cu otro tipo di intervencion cu ainda no ta haci aki na Aruba manera e asina yama klepimplantatie.

   Di e forma aki por nota con, sistematicamente, HOH ta sigui inverti den mas ekipo, prepara nos propio profesionalnan, amplia servicio, brinda mas cuido na pashent y baha e costo pa AZV. E ultimo tempo por nota cuanto adelanto tin, debi na trabaonan extenso y pisa cu a tuma luga e ultimo añanan. Hospital tin como meta pa bira un centro di cuido ehempel den e region. E intencion ta tambe pa traha di cerca cu nos rumannan den Caribe Hulandes, pa esun sostene unda e otro mester y pa nos pashentnan haya cuido den region mes, en bes di manda pashent mas leu den otro pais, cu ta papia otro idioma y cu otro costumber. E caminda ta largo y no facil, pero hunto cu nos mesun profesionalnan, nos ta avansando.