Hospital di Aruba awor tambe cu training contra agresion

Hospital ta cla pa comparti cu otronan na Aruba

ORANJESTAD (AAN): Dr. Horacio Oduber Hospital a organiza recientemente su prome charla con pa anda cu agresion special pa e asistentnan di dokter di cas y asistentnan di specialista. E prome evento aki tabatin tremendo acohida y e asistentnan a haya hopi informacion valioso cu nan por uza na pia di trabao si encaso nan haya nan mes den un situacion unda agresion ta tuma luga.

    Pa hopi aña caba HOH ta organiza training pa coleganan cu enfoke riba con pa anda cu agresion verbal.  E training aki tin como meta pa prepara coleganan con pa atende cu bishitante of pashent cu ta yega HOH cu un tristesa of ansha cu por hiba na un rabia y te hasta un tipo di agresion verbal. Algo cu siguramente no ta facil ora e momento presenta pero cu training por yuda sigur si encaso yega asina leu. 

   Tres aña pasa a cuminsa cu e prome training di aggression na HOH mes y awo cu tur e experiencia cu a genera durante añanan a opta pa habri e posibilidad pa mas persona haya e training aki y pues tambe organizacionnan cu no ta den cuido directamente. E proma charla tabata pa e asistentnan di dokter di cas of di specialista cu tambe ta pasa den e mesun casonan cu sa topa na hospital. Un anochi super exitoso y awo cla pa sigui hiba e conocemento y experiencia afo pa mas persona y organizacionnan interesa.

   Despues di e exito di e charla ta mira e necesidad y pues lo ta organizando pa e asistentnan di dokter di cas y asistentnan di specialista un training intensivo di un dia completo (8 ora) “Con pa anda cu agression verbal”. Pues con pa reconoce, evita y aplica tur instrumento si e encaso haya bo mes den un situacion di agresion verbal na pia di trabao. E dianan lo ta 21 di mei of 17 di mei of 19 di november proximo.