ORANJESTAD (AAN) – Tocante e virus Covid-19, Ricardo Jimenez a duna, den entrevista cu DIARIO,
su percepcion tocante e virus cu hopi hende ta keda kere cu ta nada mas cu un griep pisa, locual ta leu di ta berdad.
“Prome cos cu mi tin cu bisa ta cu ora mi a haya e resultado cu mi tabata positivo, hopi cos a pasa den mi mente. Esaki pasobra como dos siman prome mi a asisti na e funeral di un amigo, cu a fayece di Covid-19. Su casa, a conta mi con terible esaki a sosode. Tambe a pasa den mi mente un sobrina di mi, cu tabata bibando na Hulanda y aña pasa el a haya covid, y casi el a muri. El a conta mi tur loke el a pasa aden y tabata terible.
Pa cuminza, cada hende ta reaccion na e virus na un manera diferente. Manera tin hende cu ta asintomatico, kiermen, no ta presenta ningun sintoma, tin hende cu den e otro extremo ta haya hopi pisa y den poco dia. Mundialmente a wordo bisa cu tin un grupo di hende di riesgo, sea edad grandi, of cu tin un malesa cronico of cu deficiencia immune. E dos casonan cu mi a menciona ariba, mi amigo tabata un deportista y semper e tabata hopi sano, y ultimamente tabata hunga mas tanto softball. No tabata diabetico, ni asmatico, ni tabata tin deficiencia immune. E di dos caso, mi sobrina, ta un muher hoben di 30 aña tampoco tin ningun malesa cronico, ni autoimmune. E si a sobrebibi, pero el a haya hopi mas duro cu ami mes, y el a wordo hospitaliza, y por poco a drenta Cuido Intensivo. Su docter na Hulanda, a bise cu nan ta bay purba cu un remedi contra malaria, y efectivamente, esey a yude.
Di tanto cu a pasa den mi mente, mi a pone mi mes den man di Dios y mi a expresa “Sea Su boluntad”.
Mi a sigui indicacionnan di e docter y si nos wak e cosnan manera mester ta unico cos cu nan por a duna mi ta un tratamento pa griep, pasobra docter a splica mi cu no tin un medicamento pa combati e covid-19, solamente hisa e defensanan di e curpa.
Docter a bisa mi pa mi bebe hopi the di ginger cu lamunchi y mi tabata agrega honey. Paracetamol, y Acetil Sisteine y un jarabe pa tosamento, pasobra ami si a haya hopi tosamento.
Ta lamentable cu hopi hende tin un idea robes di e virus. Hopi ta bisa cu e ta un griep fuerte, pero esey no ta corecto. Loke mester wak ta cu e no ta un virus natural, sino traha den laboratorio. Obviamente, e ta un virus nobo pa humanidad, y nos ta bayendo mas di dos miyon y mey di hende cu a muri rond mundo, loke no ta sosode cu un griep pisa ni cu influenza. E ta un virus cu ta ataca e debilidadnan di cada persona. Hopi hende no solamente ta mal informa y tin un concepto ekivoca di e virus, pero tambe tin un concepto ekivoca di e vacuna. Tin hende ta pensa cu ningun mester pone e vacuna y cu e curpa ta genera su mes defensa. Pero ningun hende ta mescos. Cu mi a bay bon danki Dios su boluntad, pero tin hende mas hoben cu no a biba pa conta. Mi curpa a resisti e virus y a genera su defensanan pero no tur hende ta logra esaki. Mi ta kere cu e prome vacuna a yuda mi toch, aunke apenas mi tabata tin un poco mas di un siman cu mi a tume, prome cu a haya e virus.
“Ta inevitable cu tur hende lo wordo contagia cu e virus, cu ta un enemigo invisible, pero tumando e vacuna nos ta aumenta nos posibilidadnan di sobrebibi”, Ricardo a conclui.
