ORANJESTAD (AAN) – Awe, dialuna 17 di Mei ta Dia Mundial di Telecomunicacion y di e Sociedad di e Informacion (DMTSI),
cual tin como meta aumenta e sensibilizacion riba e posibilidadnan cu e utilizacion di Internet tin, den otro Tecnologianan di Informacion y Comunicacion (TIC).
E Dia Mundial di Telecomunicacion ta wordo conmemora tur aña, riba e fecha 17 di Mei, desde aña 1969, pa conmemora e aniversario di e fundacion di e “Union Internacional di Telecomunicacion” (UIT) y e firma di e prome Convenio Telegrafico Internacional, cu a tuma lugar na 1865.
Na November 2005, e Cumbre Mundial tocante e Sociedad di Informacion a pidi e Asamblea General di Nacionnan Uni (ONU) pa declara dia 17 di Mei tambe como Dia Mundial di e Sociedad di Informacion, pa asina hala atencion riba e importancia di e Tecnologianan di Informacion y Comunicacion (TIC) y e cantidad di asuntonan relaciona cu e sociedad di informacion plantea door di e Cumbre Mundial. E Asamblea General a adopta asina, na Maart 2006, un Resolucion den cual ta stipula cu e Dia Mundial di e Sociedad di Informacion, tambe ta wordo celebra dia 17 di Mei.
Den e resolucion # 68 actualiza, ta wordo invita tur Estado Miembro y Miembronan di e Sector pa celebra tur aña e dia aki, organizando programanan nacional apropia, cu e obhetivo di:
- Estimula e reflexion y intercambio di ideanan riba e tema elegi door di e Conseho di UIT. E aña aki e tema ta: “Acelera e transformacion digital den temponan dificil”.
- Realiza debatenan riba e aspectonan diverso di e tema cu tur e miembronan di e sociedad.
- Elabora rapportnan cu ta compila e deliberacionnan nacional tocante e diferente aspectonan di e tema, cu lo wordo remiti pa UIT y tur e demas miembronan.
Telecomunicacion ta un infrastructura basico di e contexto actual, cu ta abarca hopi tecnologia manera radio, television, telefon, telefonia movil, comunicacion di datonan, rednan di informatica, radio navegacion, telemetria of GPS.
E Sociedad di Informacion ta un proceso di evolucion profundo di bida y e interaccionnan entre sernan humano, gobierno, facultad y organizacionnan door di e uso intensivo di tecnologianan di informacion y comunicacion (TIC), cu ta facilita e creacion, distribucion y manipulacion di e informacion, y cu ta hunga un papel esencial den e actividadnan social, cultural y economico di un pais.
E nocion di sociedad di informacion a wordo inspira door di programanan di desaroyo di e paisnan industrializa y e termino a haya un connotacion mas politico cu teorico, pues cu frecuencia ta wordo presenta como un aspiracion estrategico cu ta permiti supera e stancamento social.
Aruba, no obstante ta un pais chikito, tin hopi avance den e tecnologia moderno y ta na su lugar pa yama pabien na nos pais y tur instancia publico y priva, cu ta nutri nos comunidad cu tur e posibilidadnan, habilidadnan y potencial cu e Telecomunicacion y Sociedad di Informacion, ta ofrece.
