Hopi a gosa di e competencia di pesca riba Dia di Piscado

*Varios pisca bunita gara

ORANJESTAD(AAN): Diadomingo tabata Dia di Pesca y relaciona cu esaki Centro di Pesca Hadicurari y Santa Rosa a organisa un competencia di pesca.

Den un entrevista cu DIARIO Hefe di Centro di Pesca Hadicurari, Byron Boekhoudt, a splica cu for di 6’or di mainta varios piscador a sali for di tur caminda rond Aruba manera Savaneta, Spaans Lagoen y Cura Cabay.

E piscadornan a cuminsa drenta for di 12’or di merdia y por a pisa nan piscanan te cu 3’or di atardi.

Tur hende cu a participa tabata tin chens di gana algun premio bunita, mientras cu esnan presente a disfruta di wak e bunita piscanan cu a wordo gara.

Tabata tin un premio special yama ‘Swordfish King’ y tambe un premio pa esnan cu por a gara un pisca yama ‘Bandera Venezolano’ cu ta un pisca masha bunita.

Minister di Sector Primario Geoffrey Wever tambe tabata presente na Hadicurari pa e dia special.

Un total di 48 boto a inscribi pa e competencia, unda cu 42 a sali bay pisca Diadomingo mainta.

Tabata bunita pa wak cu tabata tin un bunita combinacion di piscadornan veterano ta participa, hunto cu personanan mas hoben cu menos experiencia ainda, Boekhoudt a duna di conoce.