Guinness Book of World Record a registra otro record mas di Egmond Molina di Aruba

Esaki ta su di seis record di dje...

ORANJESTAD (AAN): E atleta Arubiano, esta Egmond Molina, tin diferente mencion di dje den Guinness Book of World Records.

   El a yega di kibra record door di ranca un Bus di 11 ton den 26 seconde djis rancando esaki cu su djentenan.  Tambe a yega di hisa un peso di 138,50 kilo usando un solo dede, y mas.

   Riba Diabierna mainta, a drenta informacion cu oficialmente un record nobo di dje a wordo inclui den Guinness Book of World Records.  Ta trata di e record unda el a hisa un bloki di 1.002 kilo, cu tabata wanta djis na un faha mara na su heup (‘hip belt’).

   E bloki ta uno cu e compania Apex a traha pe, y a prepara un frame di hero, unda Egmond a bay para na halto, cu e faha poni na su heup, y asina cu inspectornan presente, el a rek su curpa bay halto, y e faha mara na e bloki di 1.002 kilo, el a logra hisa esaki y asina marca un record mundial.

   Guinness a indica cu pa e categroia aki, nan ta acepta solamente atletanan cu edad di 16 aña bay ariba.

   Esaki a bira Egmond Molina su di seis record mundial cu ta wordo inclui den e publicacion.  E ta hopi contento cu e logro aki, y pueblo di Aruba sigur ta orguyoso di e respet cu e ta plantando den recordnan mundial.