Gold Mine Walk and Run tabata un gran exito

ORANJESTAD (AAN): Na final por conclui esaki cla y raspa!  E asina yama ‘Move for Mental Health 5th Gold Mine Walk and Run’ a resulta den un gran exito.

   Tabata dia 20 di October 2024 a tuma lugar e di 5 edicion di e Gold Mine Walk and Run, cual e aña aki tabata tin como tema: “Let’s Move for Mental Health” cual a sobrepasa tur expectativa di e organizadornan y participantenan.

   E evento aki a worde organiza danki na e union di diferente organizacionnan na Aruba cu ta comparti e mesun vision, yuda nos comunidad pa tin um miho bida for di e punto di salud mental. E organizacionnan cu a uni ta: Respaldo, Stichting Hunto, FADA y Healthy Lifestyle.

   E “Gold Mine Walk and Run” a cuminsa 5 aña pasa cu apenas 200 participante y a keda crece tur aña. Awe, nos ta increiblemente orguyoso pa bisa cu den 2024 a logra haci un evento cu mas di 750 persona, cual ta inclui participante y voluntarionan. Tur e personanan aki a bini hunto pa un causa importante, move pa asina yuda e salud mental. E ta inspirante pa mira con comunidad a brasa e evento. Sigur e exito aki no por a worde logra sin ayudo di e partnernan fenomenal.  Masha danki na tur hende cu a kere den e iniciativa aki y pa yuda nos haci un cambio real.

   Un danki special ta bay sigur na Patrishi Sports cual a inicia e evento aki 5 aña pasa y a laga e organizacionnan di salud mental tuma esaki over pa e aña aki.

  Salud mental ta algo cu por toca nos tur y door di core, cana y move hunto, nos ta sigui manda e mensahe cu ta ok pa busca ayudo y cuida nos mesun bienestar. Ban sigui haci e esfuerso pa kita e stigma y pa mantene e conversacion bibo!

Un felicitacion grandi ta bay na e ganadornan, pero en especial na tur persona cu a participa y asina a tuma un tempo pa nan mes y nan salud mental.