Ministro Glenbert Croes --- ORANJESTAD (AAN): E programa di gobernacion a wordo firma recien, y durante un conferencia di prensa di Conseho di Ministronan, a duna informacion di e plannan cu nan tin pa haci.
Ministro Glenbert Croes, encarga cu Ministerio di Labor, Energia y Integracion, a bisa cu e lo wordo guia pa tres di e principionan fundamental, cu ta (1) Sustainable Development Goals, (2) International Labour Organization, y (3) Derechonan Humano.
LABOR: Pa realiza un maneho efectivo, segun Ministro Croes e siguiente pasonan tin di wordo realiza. Esey ta pa equipa, digitaliza, y automatiza Directie Arbeid en Onderzoek (DAO) y DPL, introduci un ordenanza nacional di registracion obligatorio cu ta regula mercado laboral y necesidad di personal.
Tambe complementacion di e registracion obligatorio pa investiga e desaroyo y necesidad riba mercado laboral, tambe actualiza y moderniza e maneho laboral vigente conforme e codigo civil cu recien a drenta na vigor. Tambe actualiza y moderniza e leynan laboral y maneho di retiro di acuerdo cu condicionnan a base di resultado di investigacion haci den cuadro di Landspakket cu ta conta tambe cu un base amplio den dialogo tripartidista social laboral.
Enseñanza pa Empleo y “Aruba Kier Traha” lo percura pa recapacitacion di nos hendenan pa asina por cumpli cu e demandanan laboral y necesidadnan. Pa cu e exigencia di Landspakket pa crea un sistema di seguridad social, aki tambe lo traha di cerca cu e programa di ‘Aruba Kier Traha’.
Den e maneho nobo di integracion lo combati e circuito di empleo iregular y ilegal. Lo bay formaliza e Bureau di Dialogo Tripartidista Social Laboral conforme exigencia y delineacion di I.L.O. Tambe lo percura pa salud y seguridad na pia di trabao door di introduci e ley di ARBO. Lo introduci un maneho laboral efectivo den cual lo garantiza y proteha e derechonan laboral.
Ministro a bisa cu lo bay bin cu un organo multidisciplinario consistiendo di DAO, Dimas, DPL, y hasta Guarda Nos Costa pa efectua inspeccionnan pa asina sigura y promove cumplimento cu leynan.
