ORANJESTAD (AAN): Dialuna e ministernan di gabinete Wever Croes II a firma e programa di gobernacion y cada minister a haya e oportunidad pa splica kico ta e plannan cu e tin cu e kier implementa via su ministerio.
Pa loke ta minister di Husticia y Asuntonan Social Rocco Tjon, el a trece dilanti cu su plan di maneho a wordo concretiza, despues cu el a reuni cu practicamente tur servicio y sindicato, pa por incorpora nan puntonan di importancia den e plan di maneho.
“E enfoke primordial ta riba prevencion, pero prome cu nos yega eynan ta importante pa nos inverti den nos departamentonan”.
Pesey mes e punto di organizacion y personal lo tin e prome prioridad, segun Tjon.
El a sigui bisa cu ta importante pa tur e departamentonan cu ta bao di un reorganizacion aworaki, pa e reorganizacion aki por wordo finaliza pasobra sino lo bira practicamente imposibel pa e profesionalnan cu ta traha den diferente departamento por atende cu e retonan nan dilanti.
E mandatario a sigui bisa cu e tin un palabracion tambe cu e sindicatonan cu otro aña, segun e plan di maneho, lo yega na un plan di maneho cu ta bay acapara 2022 te cu 2025.
E plan di maneho aki lo elabora solamente riba e parti di ‘bedrijfsvoering’ y e parti di personal, pa asina por segura cu tur e departamentonan aki ta haya materialnan necesario y tambe e personal ta haya e parti cu nan tin derecho riba dje pa loke ta nan promocionnan na tempo.
“Obviamente prevencion ta bay ta e punto di salida y pa bo por duna bon contenido na prevencion, bo sistemanan pa loke ta informacion y inteligencia mester ta up to date”.
Pa loke ta e parti social, Directie Sociale Zaken pero tambe Cuerpo Policial, e prome proyectonan cu lo bay haya prioridad ta e proyectonan di ICT, pa asina ambos organizacion tin e parti aki compliant y atravez di e Mobile Data Terminals, nos patruyanan riba caya tambe por bay wordo poni na un manera mas eficiente y eficaz pa haci nan trabao, segun e minister.
El a splica cu pa loke ta e delitonan specifico, e delitonan di alto impacto lo bay tin e prioridad, esta tur e tipo di delitonan cu tin un toke di violencia na dje manera abuso, atraco den cas y tambe abuso sexual.
“Combati corupcion ta un punto hopi importante di e ministerio aki, unda cu e intencion ta tambe pa prome cu fin di aña cera un acuerdo di cooperacion cu Hulanda, caminda cu fondonan lo wordo poni disponibel unda cu Ministerio Publico ta bay haya su propio unidad pa combati corupcion”, segun Tjon, kende a indica cu lo atende tambe cu e necesidadnan di Cuerpo di Bombero.
Su ministerio ta encarga tambe cu adiccion y salud mental y pesey tin diferente palabracion haci cu e stakeholders, unda cu prome cu fin di aña lo percura pa firma un protocol entre e departamentonan aki pa e cooperacion entre nan ta mas mihor, pa asina e cuido aki bira mas accesible.
