Minister Mervin Wyatt-Ras:
*Ta bay lanza tambe un campaña pa preveni suicidio
ORANJESTAD (AAN)-- Minister di Asunto Salud, Asunto Social y Asuntonan di Adulto Mayor, drs. Mervin Wyatt-Ras, den entrevista cu DIARIO a sigui splica, riba tereno di salud, cu gobierno ta purbando di haya e diferente profesionalnan cu mester, y aworaki a logra haya un “Kinder Psikiatra”, despues di basta tempo, y e ta basta contento cu ne p’asina nan continua.
“Aworaki, gobierno ta bezig cu un plan di salud mental, y a haci un encuesta via di Facebook, y nos ta bay lanza tambe un campaña di prevencion, pa loke ta trata suicidio, pues problemanan di salud mental, anto e pregunta cu bo tin cu haci bo mes ta: ‘Bo ta bon?’ Pasobra tiki biaha un hende ta puntra bo: ‘Con bo ta sinti bo?’ ‘Ki ta pasando cu bo?’ Nos ta gewoon pasa riba otro, cuminda otro, nos no ta realiza cu tin hende cu tin un dolor den nan curazon, of cu nan tin un tristeza. Nos ta tuma cu tur hende ta ok, sin para keto na esey. E ta un campaña cu nos kier lanza pa tur persona por tuma mas precaucion cu otro, duna otro mas atencion, y tambe preocupa pa otro. Esey, si nos por logra den esaki, un tiki mas bo ta traha no solamente riba e parti ora e problema tey caba, pero tambe bo ta yuda cu e problema aki no ta surgi, pasobra un ta duna otro, atencion. Y esey ta e meta e ora ey, y nos ta bezig trahando e plan, y asina cu e keda cla nos ta bay lans’e, anto tur hende ta haya sa tambe, y nos ta bay via e medionan di comunicacion y nos ta conta tambe cu nan sosten p’asina transmiti e mensahe aki pa nos pueblo”, Minister Mervin Wyatt-Ras a duna di conoce.
