Pa un famia cu 2 yiu...
ORANJESTAD (AAN): E asina yama bestaansminimum ta e nivel minimo di entrada cual ta wordo percibi cu ta necesario pa logra mantene un nivel di bida adecuado den un cierto pais.
Usualmente e bestaansminimum ta wordo determina door di calcula e gasto di tur e recursonan esencial cu un adulto ta consumi den un luna of aña. Generalmente esaki ta wordo yama un indice basico di necesidad, y e ta varia segun e prijs di cuminda, paña, vivienda, transporte y otro articulonan den e “canasta”.
Escalanan di ekivalencia ta wordo usa pa ahusta e nivel minimo di entrada percibi pa hogarnan di diferente tamaño y composicion. E escala ta asigna un peso di 1.0 pa e prome adulto y 0.5 pa cada adulto adicional den e hogar (edad 15+) y un peso di 0.3 pa cada mucha (edad 0- 14). E bestaansminimum ta basa riba cifranan di e rapport “Bestaansminimum 2010” y ta wordo actualisa mensualmente pa cu inflacion usando e CPI mensual.
E unidad di referencia den e rapport aki ta di un hogar cu ta consisti di 2 adulto y dos mucha (edad 0-14).
Na september 2026, e bestaansminimum mensual pa un hogar consistiendo di 2 adulto y dos mucha (edad 0-14) ta 5.669 Florin, un aumento di 148 Florin compara cu september 2025 (e tabata 5.521 Florin).
E aumento aki a wordo causa principalmente door di aumentonan di Afl. 81 y Afl. 36 den e sectornan “Cuminda y bebida no alcoholico” y “Transporte”, respectivamente. E caida mas grandi na september 2026 a wordo registra den e sector di “Paña y sapato” (Afl. -5).
Na September 2026 e bestaansminimum mensual pa un hogar cu ta consisti di un solo adulto ta 2.700 Florin, cual ta resulta den un deficit di entrada di 693 Florin. Esaki ta representa un aumento di 50 Florin compara cu e deficit observa un aña pasa (643 Florin). E deficit aki ta e di dos mas halto registra pa luna di september durante e ultimo 6 aña.
