Gobierno aki no ta esun cu a duna tereno na Iberostar pa construi hotel na Eagle Beach

Minister Evelyn Wever-Croes:

• Ya desde 2005-2008 Iberostar a cumpra 3 proyecto cu tereno 

ORANJESTAD (AAN): Prome Minister Evelyn Wever-Croes, riba comentarionan recien den media tocante un hotel na Eagle Beach, a duna di conoce cu Gabinete Wever-Croes no ta esun cu a duna tereno na Iberostar, ni a duna permit pa construi un hotel den e area aki.

   Prome Minsiter a indica cu ya desde 2005 pa 2008, e tereno en cuestion y e proyecto, a bira doño di Iberostar hunto cu dos otro proyecto cu tereno.

   Iberostar, Prome Minister a remarca, ta un caso hopi particular. Ibersotar a cumpra tres proyecto di hotel cu ya caba tabata tin tereno desde 2005 pa 2008 bin dilanti. Un tereno ta situa na Tierra del Sol, un situa patras di Eagle Beach y e ultimo, na Eagle Beach na unda e construccion actual ta tumando luga.

   Prome Minister a duna di conoce cu Iberostar semper tabata dispuesto pa sinta na mesa cu Gobierno na unda cu Gobierno a splica nan cu Aruba no por carga tres hotel mas na e momentonan aki. Teniendo cuenta cu esaki, Iberostar a bay di acuerdo pa baha e cantidad di cambernan y construi menos camber di loke nan tin derecho riba dje. Iberostar a bay di acuerdo tambe pa no construi tur tres hotel pareu pero ta parti e construccion temporisa den tempo.