Gobierno a pone 550 mil florin pa drecha e piernan y esun prome lo ta e Pier di Brisas del Mar

Minister Geoffrey Wever a duna di conoce:

ORANJESTAD (AAN) Den conferencia di prensa cu a tuma lugar banda di e pier di Brisas del Mar, na Savaneta, Minister Geoffrey Wever a tuma e oportunidad pa anuncia cu gobierno ta bay drecha e piernan y esun prome lo ta e Pier Brisas del Mar, y ya caba a realiza destaho p’esey.

   E dignatario a declara cu den un di e combersacionnan cu señor Thijsen, el a menciona cu e kier renoba e piernan di Savaneta, y mirando cu originalmente Savaneta tabata e prome capital Aruba, pero unda tin hopi cultura di pesca, hopi piscado y e piernan tabata den mal estado, loke señor Thijsen a trece na e minister su atencion tambe, el a bisa “ki hubo si gobierno por drecha e piernan” y nan a scucha e peticion aki, y recientemente cu e cambio di presupuesto 2025 a aloca 550 mil florin pa renoba e piernan, y esun prome cu ta bay renoba ta esun di Brisas del Mar.

   “Mi por comparti cu nos a haci un destaho caba, y e resultadonan ta paden. Mi ta kere cu pa otro siman nos por bay over na firmamento di e contrato cu e contratista cu ta bay renoba e pier aki”, Minister Geoffrey Wever a duna di conoce.