Minister Dowers a contesta pregunta den Parlamento:
ORANJESTAD (AAN) Durante un reunion den Parlamento, Minister di Husticia mr. Arthur Dowers a contesta algun parlamentario cu a haci pregunta, dirigiendo na Presidente di Parlamento. Entre otro, kico e ta bay haci pa loke ta iluminacion na e cruzadanan riba caminda.
“Nos tin nos atencion riba e problema di trafico, cu no ta insigur di awo pero pa basta aña, y nos a cuminza caba cu e comision nos ta bay pone tur persona hunto, y nos ta bay traha, entre otro, riba iluminacion, uso di tecnologia, flitspaalen (tipo di camera automatico cu ta detecta velocidad) p’asina ey alomenos stimula hende pa nan adapta nan comportacion, pasobra un parti grandi ta bay na comportacion di hende.
“Nos como gobierno no tin ningun otro instrumento adicional, cu no ta controla, informa, y sanciona pa bo por adapta comportacion di hende”, e dignatario a argumenta.
Minister Dowers a agrega cu e ta tende, por ehempel, riba clubnan nocturno. Ta berdad cu tin clubnan nocturno, pero masha tiki, cu tin un vergunning y ta keda habri masha ora largo. Pero hendenan no ta bebe den club nocturno so, tin cu ta bebe bao di palo, entre otro, bebemento ta na moda, sinembargo, bebemento no ta castigable. Loke ta castigable ta pa bo subi maneha un auto bao influencia di alcohol y si bo ta hopi burachi riba caya bo por wordo deteni si bo crea problema pa bo mes of pa otronan, pero riba su mes bebe no ta castigable, loke ta sosode despues di bebe ta e problema”, Minister Dowers a reitera.
E dignatario a subraya cu e plan ta cu gobierno a cuminza caba trece tur hende hunto, nan ta inventarizando, a cuminza cu e verkeers controlnan.
El a agrega cu despues cu nan a cuminza cu controlnan basta grandi, e lista na D.T.I pa afspraaknan pa keur auto, a aumenta hopi diripiente. “Bo ta mira cu e controlnan ey ta hopi necesario y nos ta haciendo nan”, Minister Dowers a señala y a bisa cu e no ta bay cambia e comportacion di tur hende, por ehemplo esnan cu a custumbra di haci loke nan kier, cu e chens pa nan wordo gara ta hopi chikito.
