Arubiano cu a haci hopi pa islanan den Antiyas
ORANJESTAD (AAN): Un informacion publica den e corant Extra Bonaire di Boi Antoin, a anuncia e fayecimento di ex-Notario, Thom Hernandez.
Thom a nace na Mahuma na Aruba, y ta yiu di un panadero y tambe agricultor. Semper e ta bisa cu e ta un Arubiano orguyoso, y tabata adora su isla, su Himno, su idioma, cultura, y tur cos. Thom Hernandez a sa di inspira tur hende den Caribe, como tambe motiva nan.
Thom Hernandez a traha como Notario na Bonaire. E tabata un persona hopi conoci na e isla di Flamingo durante decada di sesenta y setenta. Banda di notario e tabata hefe di e Departamento di Cadaster na Bonaire, loke tabata posibel den un tempo y riba un isla caminda tabatin tiki profesional disponibel.
El a sinta hopi den e edificio di famia Sint Jago den Kaya Grandi, dilanti di Hotel Rochaline. Thomas Lindoro Hernandez a nace na Aruba dia 21 di December 1930 y el a muri Diaranson 14 di Januari na Dordrecht, Hulanda, na unda el a pasa e ultimo añanan di su bida.
Den su participacion di morto ta describi Thom Hernandez como un persona special, colorido y inspirado. Thom Hernandez a traha tanto riba su isla natal Aruba como na Isla Ariba.
Despues el a establece na Bonaire, na unda el a ocupa e funcion di hefe di Cadaster, alavez notario. Den e ultimo funcion aki e firma di Hernandez ta aparece bao di hopi acta pa lanta compania, organizacion y fundacion, benta y traspaso di tereno, den añanan sesenta y setenta, en todo caso te na momento cu a nombra Alfred Knuf como notario riba e isla.
Durante su carera laboral na Bonaire, Thom Hernandez a resalta como un experto riba tereno di cadaster. Den e periodo cu el a traha na Isla Ariba, Thom Hernandez a pone partinan grandi di Saba, St. Eustatius y St. Maarten riba mapa. Pero su curason a pega mas tanto na Bonaire, na unda el a biba hopi aña cu su famia den un cas situa na e skina di Bulevar Nicolaas (Cola) Debrot y Kaya Antonio Neuman. Un funcioonario di Cadaster encarga cu trabao pafo, asistente principal di Thom Hernandez, a yega di describi Thom como un persona cu conocemento enorme di terenonan na Bonaire.
Den decada setenta Cadaster, bao di maneho di Thom Hernandez, tabata hopi ocupa cu midimento y coreccion di parcelanan bieu riba e isla. Den e tarea aki empleadonan di Cadaster tabata descrubri situacionnan curioso y straño. Decenas di tereno banda di e plantashinan, of na otro lugar den areanan di cunucu tabata tin nomber di un doño. Gobierno no tabata tuma decision pa regla e situacionnan aki.
Thom Hernandez y su team di Cadaster a traha duro pa trata na trece claridad den e situacion aki, haciendo uso di fotonan topografico cu KLM Aerocargo a saca den añanan sesenta. Thom Hernandez tabata un personahe prominente den e bida social riba e Bonaire di decadanan sesenta y setenta. Su yiunan morocho Corinne y Germaine Hernandez semper tabata hala atencion den e tempo ey. Despedida di Thom Hernandez lo tuma lugar Diamars 20 di Januari 2026 pa 4’or di atardi na ‘Crematorium de Essenhof’, Dordrecht, Nassauweg 200, Hulanda.
Info pa cortesia di Boi Antoin, y tambe su amiga Mireille Lafleur, biba na Belgica, kende a bisa cu Thom tabata un gran inspirador pe, tambe a describi e fayecido como un genio, charmant, un gentleman, y un bon amigo. Palabranan di condolencia na famia y conocirnan.
