Gezaghebber na Bonaire a duna OK pa habri bahia di Sorobon atrobe

A bolbe mira e reptil riba Dialuna

• Pasenshi di algun Boneriano a cuminza caba pa cu e Crocodil 

KRALENDIJK: Por a tuma nota cu despues di un siman cu acceso pa beach di Sorobon, y tambe bahia di Lac a wordo prohibi pa tur hende na isla di Bonaire, relaciona cu presencia di un reptil cu ta ‘Saltwater Crocodile’ mira den e bahia... cu tin varios persona cu nan buchi a yena!  E prohibicion pa bay eynan, tin hopi piscado malcontento.

   Aunke Gobierno di Bonaire hunto cu Stinapa ta keda duna update na e comerciantenan cu tin na Sorobon riba e progreso, perspectiva, y peligro cu ta existi, y tur cos cu ta wordo haci, aparentemente e rosea cayente a cuminsa wordo sinti na garganta di gobernantenan y tambe di Stinapa.

   Pa tal motibo, riba Dialuna mes un biaha mas Gezaghebber John Soliano a convoca un conferencia di prensa, caminda el a divulga cu e mainta ey a bolbe spot e Crocodil ainda den bahia di Sorobon.  El a wordo mira den e area cu hopi hende a calcula cu e reptil lo a tuma awor como su habitad temporal.  E ta den area di mangelnan cu ta un zona protehi, caminda toch hende no ta supose di drenta.

   Gezaghebber Soliano a subraya cu e Crocodil aki ta uno cu comportacion hopi shimaron, cu e no ta dirigi riba hende, y su cuminda faborito ta animalnan chikito den e bahia, y e area di mangrove.

   Basa riba e analisis aki, Gezaghebber a indica cu e decision a wordo tuma Dialuna cu e bahia di Sorobon, principalmente e parti di negoshinan den sector di Sorobon lo por cuminza duna servicio bek desde Dialuna 12:00 pm.

   Pero den mesun rosea, Gezaghebber a accentua cu lo no bay permiti pa drenta e area di mangrove, pues esey a bira “area cora”.  Tambe tin otro sector adicional cu autoridadnan a designa tambe como ‘area cora’, mirando e comportacion y habitad di e reptil aki cu esakinan lo ta area cu no mag di drenta aden, excepto Piscadornan cu ta sali of regresa bek di lama despues di a caba di pisca.

   Pues e conseho toch ta keda pa evita di drenta lama (si acaso esey no ta necesario), y si bo drenta bo ta haci esaki riba propio riesgo.

   Tambe ta prohibi pa instancianan particular, of hendenan priva, pa tuma iniciativanan pa sali y pa bay busca e reptil aki, y sigur den areanan indica cu no tin acceso pa nan.  Gezaghebber a gradici cooperacion di pueblo pa e pasenshi, y tambe e yudansa cu a haya di Stinapa.  E ta mira si cu lo bay sigui busca forma pa captura e reptil.  E ta bolbe ripiti y pidi pueblo pa no drenta den e areanan prohibi aki.

   Stinapa a indica cu nan ta haciendo uso extenso di Drones pa keda vigila e area unda Dialuna mainta a spot e Crocodil, pa asina por pasa pa un forma safe y captura e reptil.