Fundacion Snoop Doggy ta lansa nan “Sleepover Project” pa siña muchanan con pa cuida nan mascota

Riba 28 di october 2025 a tuma lugar e presentacion di e “Sleepover Project“ na JOIA by Iberostar.

Un grupo grandi di maestro y director tabata presente pa tende mas tocante e projecto nobo cu lo ta hopi educativo.

Den e ultimo 2 añanan, Fundacion Snoop Doggy a bin ta publica y reparti diferente buki educativo na tur scol basico rond di Aruba. Pa pone e teoria den practica, e Fundacion a dicidi di introduce e “Sleepover Project” – un experencia nobo y practico pa siña muchanan loke berdaderamente ta nifica pa cuida un mascota.

Tur weekend, un alumno di 2de klas lo hiba e peluche di Snoop Doggy cas, cas hunto cu un buki di actividad/tarea. Tambe e alumno lo haya un tas unda tin diferente articulo pa cuida e peluche p.e. un leash, baki di awa y cuminda y mucho mas. E idea patras di e projecto ta pa yuda muchanan compronde  loka ta significa pa tin un mascota. Cu esaki no simplemente kiermen pa laga e mascota den cura pero cu esaki ta ensera pa dun’e cuminda, awa, atencion y hopi amor.

Pa finalisa e projecto, e alumnonan lo participa den un role-play den klas unda cu lo tin e posibilidad di bisti como un veterinario, cumpra cuminda di cacho cu moneda di Snoop Doggy y mucho mas.

Fundacion Snoop Doggy kier a gradici JOIA Aruba by Iberostar pa pone un bunita sala disponibel pa tene e presentacion. Ademas un palabra di danki na e tremendo sponsors cu ta hasi e projecto kinan un realidad : Renaissance Wind Creek Aruba Resort, La Cabana Beach Resort Aruba y Martijn Trading.

Si ta desea di participa na e projecto of kier duna un man, por tuma contacto cu Fundacion Snoop Doggy na Cette adresse e-mail est protégée contre les robots spammeurs. Vous devez activer le JavaScript pour la visualiser. of 592 0642.