ORANJESTAD (AAN): Diaranson mainta, Fundacion Parke Nacional Aruba (FPNA) a reacciona riba sentencia di Huez
den caso sumario cu a wordo entabla pa purba stop trabao di construccion cu ta sigui na Aruba Ocean Villas, e proyecto di hotel cu ta keda na Savaneta, net un tiki pabao di Marinierskazerne.
Director interino di FPNA, esta Norman Kuiperi a duna e reaccion riba e sentencia di Huez. El a agrega cu nan nunca a bisa cu nan ta contra e proyecto, pero tin di tene cuenta cu naturaleza pa purba di haci menos daño.
Nan punto di bista ta cu Aruba Ocean Villas tabata haciendo trabaonan y expandiendo e lugar, siendo cu no tin permiso pa esey. Den pasado a yega di papia y delibera cu esnan di e proyecto, pero como cu no tabata yega na ningun clase di razonamento, e ora Fundacion FPNA a opta pa bay hiba e caso dilanti Huez.
Finalmente den e sentencia, Corte den e Caso Sumario, a dicidi cu esnan responsable pa Aruba Ocean Villas no mag di haci ningun parti di construccion sin e permisonan apropia cu no tabatin.
Esey ta loke Fundacion FPNA tabata luchando pe tambe, esta cu no por haci trabao siendo e vergunning no ta existi, y keda cu e esencia pa proteha naturaleza. Kuiperi a menciona tambe cu e cambionan haci na e lugar ey, lo no encurasha tortuganan di bin bek eynan pa pone webo.
Tambe Huez a indica cu si nan haci esey, e lo por tin consecuencia di boet di 10.000 Florin pa cada infraccion cu wordo haci di nan parti.
Segun Kuiperi, loke FPNA nan a trece dilanti den Corte ta cu e desaroyadornan di Aruba Ocean Villas no tabata tene cuenta cu naturaleza, y tabatin destruccion di mangelnan, y Huez a referi na esey tambe den su Sentencia.
Na su opinion, loke Huez a bin remarca riba dje, ta algo tristo y di berguenza tambe pa e desaroyadornan, esta cu e ta exigi cu bo mester tin e permisonan necesario pa haci e trabao. Y e ta algo cu ta contrario na loke e desaroyadornan ta purba aparenta den pueblo cu nan lo tin permiso. Pero Huez ta mustra bon cla den su sentencia cu si esnan di Aruba Ocean Villas kier haci trabao di construccion, esey por, pero bo mester tin e permiso.
Fundacion FPNA semper ta keda disponible pa dialoga y ta spera cu e gritonan pa cu proteccion di naturaleza wordo scucha.
