Paisnan ta bolbe tuma medida contra peliger di pandemia - *Centronan di recreo mes ta cera porta enfrente peliger malesa - *Hulanda ta considera regreso na medidanan contra Covid-19
ORANJESTAD(AAN)—Mundo ta canta victoria incondicional prome cu e tabata tin prueba cu nada lo pasa? Esaki ta e pregunta cu tabata central na varios pais ayera.
Hulanda tambe ta riba e lista di nacionnan cu ta admiti cu e mester tuma un decision entre libertad of bida, despues cu libertad a bira causante di aumento barbaro di e cantidad di casonan conoci di Covid-19.
Mundo ta haya su mes confronta cu un pregunta serio.
Na momento cu e pandemia a presenta su mes na 2020, gobernantenan di paisnan liber mester a tuma un decision importante. Nan lo a dicidi pa bida of pa libertad?
Pa splica e situacion aki, mester bolbe na e momento cu mundo a tuma nota di e velocidad cu cual Covid-19 tabata conkista mundo. Gobernantenan mester a dicidi si nan ta tuma medida en espera di e momento cu a crea inmunidad nacional cu ta exigi cu 85 porciento di poblacion di comunidad ta vacuna contra e malesa.
E otro opcion tabata, pa duna e malesa rienda suelta y laga tur hende haci loke nan kier y core e riesgo cu nan ta haya e malesa y muri. Esaki lo a implica cu mucho mas tanto hende lo a muri di Covid-19 pero tambe cu asina mas hende lo a haya imunidad sin e vacuna.
Laga hende muri sin mas, no ta parti di teorianan humano y mescos cu Aruba, un gran parti di mundo a cera porta pa e coronavirus nobo mientras ciencia tabata traha riba un remedi, cu ainda no a haci su entrada pero tambe un vacuna.
Con rapido mundo a logra presenta un vacuna, ta algo cu poco hende a spera. E pensamento tabata cu na 2022 mundo lo por a cuminsa mira regreso na normalidad.
Durante e temporada cu medidanan a wordo tuma, cantidad di hende a hunga wega barata cu publico y gobiernonan mester a implementa leynan severo pa asina a evita cu Covid-19 a mata cantidad di hende cu awor a haya nan vacuna y segun cifranan oficial, tin menos chens di muri of keda cu lesionnan serio resto di nan bida si nan haya e malesa.
Actualmente hasta ta wordo papia di necesidad di un tercer shot pa asina sigui controla e malesa mortal.
Na e momento aki ainda mundo no conoce e cantidad suficiente di hende vacuna. Hasta na paisnan cu a alcansa e cifra aki, a keda proba cu entrada di e malesa ta sigui crea un peliger.
E siman aki un alarma ta wordo bati. Mundo mester tene na consideracion cu Covid-19 no a desaparece pero cu e ta keda un enemigo mortal.
Na Hulanda por ehempel hasta centronan di baile y recreo a dicidi nan mes, cu nan ta cera porta despues cu e pais a deshaci di tur medida.
Gobernantenan Hulandes ta papia di introduccion di medida atrobe pa evita otro ola despues cu mas y mas hende a dicidi cu nan ta bay baila, sin tapaboca y sin medida.
Kico lo pasa? Mester opta pa bida of pa libertad? Mester permiti Covid-19 mata a pesar di tur sacrificio cu mundo a hiba?
Un contesta mester wordo haya pa un mundo cu no por dicidi pa su mes aparentemente.
