Fundacion pa Nos Muchanan a organiza exitoso Dia Pedagogico pa su trahadonan

Natasha Gilkes:

ORANJESTAD (AAN) – Señora Natasha Gilkes, Funcionario di Fundacion Pa Nos Muchanan (FPNM), den un entrevista cu DIARIO a elabora tocante e di nuebe edicion di nan Dia Pedagogico, cu ta un dia di estudio pa tur persona cu, diariamente, ta traha den un Centro di Cuido di Mucha, crioyamente yama crèche, traimerdia, of un combinacion di ambos.

E dia pedagogico a tuma lugar Diasabra cu a pasa, y esaki ta un encuentro cu a inicia diez aña pasa, naturalmente cu un gap na 2020 durante e pandemia, cu e actividad aki no a wordo ofreci.

Natasha Gilkes a menciona cu cada aña nan ta traha un tema diferente, y hopi biaha na final di un Dia Pedagogico, esnan cu ta participa ta yena un evaluacion y a base di esaki nan ta scoge un tema pero tambe nan ta keda atento na e temanan actual y nan ta scoge e tema pa e Dia Pedagogico, cu e biaha aki tabata: “Conflicto tin un solucion”,  Gilkes a indica.

El a agrega cu nan a scoge e tema aki, pasobra mayoria di e trahadornan pedagogico ta indica na e fundacion cu tin biaha nan ta haya nan mes den un situacion di conflicto. “Pues kizas bo a haya bo den conflicto cu un mayor, of cu un colega, of cualkier otro persona cu bo ta yega con contacto cu ne durante bo trabao, of kizas tin conflicto entre muchanan”, Natasha Gilkes a señala.

El a agrega cu esaki ta hopi importante pa sa, pa asina e persona ta bon ekipa, sa con pa haci y con pa soluciona esaki, pero si e conflicto aki escala cual ta e miho forma pa solucion’e.

“Pa e motibo aki nos tabata tin cuater orado mainta, durante nan tayernan di trabao. Nos a cuminza cu un sesion plenario prome, unda cu señor Raymond Maxwell, cu ta mediador, a duna informacion tocante esaki” Gilkes a indica.

Despues a wordo forma cuater grupo y cada un a sigui otro tayer di trabao. E personanan cu a duna tayer ta señora Adeline Rasmijn, señora Carolina Pieters, y señor Aldrich Croes, ken a elabora tocante “self defense”.

El a subraya cu e mainta aki tabata hopi informativo y valioso, y cu nan por uza bek den nan trabao diario. “Esaki ta net e meta di e Dia Pedagogico. Ekipa e trahadornan pedagogico na un miho manera posible, pa contesta cualkier pregunta cu nan por tin durante un dia manera awe, y tambe eleva e calidad di e centronan di cuido di mucha”, señora Gilkes a señala.