ORANJESTAD (AAN): Den cuadro di e Common Good Conference y Expo diahuebs y diabierna, diferente fundacion riba Aruba lo mustra con nan ta aportando,
ya pa hopi aña caba, na e bon comun. Un di nan ta Fundacion Muchila Creativo, un fundacion di arte cu ta existi casi 23 aña y cu ta hiba arte y creatividad na centro di desaroyo comunitario.
Segun Rose-Marie Provence di Fundacion Muchila Creativo, e fundacion ta traha den diferente disciplina artistico, entre nan musica, teatro, baile, arte visual, multimedia y literatura. Durante casi dos decada y mas, nan a realisa un cantidad di proyecto cultural cu a beneficia comunidad, abarcando mucha, hoben y adulto di tur edad.
“Nos ta traha cu arte pa mucha, hoben y adulto, pa tur edad, y nos a realisa hopi proyecto pa comunidad durante casi 23 aña,” segun Rose-Marie Provence.
E fundacion ta mira arte como un instrumento esencial pa expresion, desaroyo personal y cohesion social. Pa medio di nan programa y proyecto, Muchila Creativo ta contribui na formacion cultural y fortalecimento di e identidad comunitario riba Aruba.
Fundacion Muchila Creativo lo ta presente durante e Common Good Expo dia 29 di januari, unda nan ta invita e comunidad pa pasa, siña mas tocante e fundacion y di Colegio Muchila Creativo, y topa otro organisacion cu ta traha den e mesun area.
“Nos participacion na e expo ta pa conoce otro organisacion y mira con nos por aporta mas y hunto na e bon comun,” e representante a agrega.
Pa medio di e Common Good Expo y Conference, Fundacion Muchila Creativo ta reafirma su compromiso cu arte como un forsa pa bienestar colectivo, colaboracion y crecemento comunitario, invitando tur interesado pa forma parti di e dialogo y inspiracion pa un Aruba mas creativo y solidario.
