ORANJESTAD (AAN): Diadomingo anochi, e filosofo Hulandes Ad Verbrugge, a yega Aruba como un di e oradonan principal pa e conferencia tan anticipa di e Bon Comun.
E Common Good Conference ta tuma luga diabierna dia 30 di januari 2026 na Renaissance Wind Creek Conference Center y ta conta cu un lista impresionante di orado.
Ad Verbrugge ta un filosofo Hulandes cu a studia filosofia na Universidad di Leiden y a haya su doctorado cu un disertacion riba Zijn en Tijd di Martin Heidegger, despues publica como De verwaarlozing van het zijnde. Verbrugge a bira docente principal na Vrije Universiteit Amsterdam, unda e ta duna les di filosofia social, cultural y economico, y a sobresali como miho docente mas cu un biaha.
Su trabou ta combina filosofia academico cu experencianan for di sociedad, y ta uza pelicula, literatura y diferente medio di comunicacion pa splica su ideanan mas miho. Cu su buki Tijd van onbehagen (2004), Verbrugge a gana reconocemento amplio pa su critica riba sociedad occidental como un cultura cu ta bay leu di balornan tradicional. Verbrugge a bira un figura publico door di su aparicion den programanan manera Tegenlicht y Het Filosofisch Kwintet.
Den su obranan mas recien, incluyendo Staat van Verwarring (2013), el ta sigui profundisa riba temanan di individualisacion y fragmentacion social. Na 2015 el a co-funda Centro Ethos na Vrije Universiteit, y na 2016 a ricibi condecoracion como Officier den Orden di Oranje-Nassau. Na 2018 el a crea e serie di television Onderstromen, unda el a bay den combersacion cu hende na costa di Hulanda riba preguntanan fundamental di bida.
