Fundacion CINEARUBA ta buscando peliculanan local pa presenta durante e festival di cine di Playa

ORANJESTAD (AAN): E aña aki lo ta e di dos aña di Playa Film Festival y fundacion CINEARUBA ta buscando peliculanan largo y cortico pa presenta durante e festival di cine.

            E inscripcion cu a habri dia 28 di januari ta yegando su final, di cual e ultimo dia pa entrega pelicula ta riba dialuna 15 di augustus. Ta ricibi pelicula unicamente via https://filmfreeway.com/playafilmfestival. Por bishita CINEARUBA su Facebook pagina pa mas informacion.

            Tur e peliculanan tanto cortico y largo lo ta competiendo pa e premio publico di miho pelicula.

            Ta acepta peliculanan no mas bieu cu dos aña. Duracion di peliculanan cortico ta bao di cuarenta minuut y tur peliculnan riba cuarenta minuut lo cay den e categoria di peliculanan largo. E formato di exhibicion lo ta MP4.

             Pa detayenan con pa exporta imagen y sonido por wak un splicacion di esaki riba e pagina di Film Freeway.

            E edicion di Playa Film Festival di e aña aki ta conta cu apoyo di Ateliers ’89, Setar y Prins Bernhard Cultuurfonds Caribisch Gebied.

            E festival di cine lo tuma lugar un biaha mas na Ateliers ’89 for di 6 te cu 9 di october. Ta bay tin diferente tayer tanto pa mucha, hoben y adulto.

            Ademas di tayernan tambe ta bay tin diferente presentacion di peliculanan tanto local y internacional.