FUNARI lo organiza e aña aki un evento musical pa recauda fondo

Maritza Brendelin Rasmijn:

ORANJESTAD (AAN) — Den entrevista cu DIARIO, señora Maritza Brendelin Rasmijn, di Stichting FUNARI, a menciona cu e aña aki nan tabata hopi activo riba tereno di recaudacion di fondo, y e biaha aki nan kier a bin cu algo diferente.

            El a splica cu tur aña nan tin un bazaar na FUNARI, pero e aña aki nan a dedica mas na e actividad di musica. “Musica ta un di e instrumentonan pa bo por yega e pueblo, yega na orea, y nos tin un mensahe special e aña aki. Anto, banda di esey, nos a organiza un evento musical cu lo cuminza for di 6’or di atardi pa 10’or di anochi, na unda cu nos lo presenta e cancion nobo ‘Reflexion di Fin di Aña’ cu ta bay drenta e siman aki, pa nos por tir’e riba mercado, na radio, na television, tur caminda”, señora Rasmijn a menciona.

            Señora Rasmijn a informa cu e actividad aki ta bay ta dia 23 di November. “Funari ta cobra 10 florin, pero no mir’e como un entrada sino un manera pa bo yega na e donacion pa nos por logra nos metanan. Un di nos metanan hopi importante, ta ehercicio, pa personanan cu limitacion, cu ta nos ‘target group’. Practicamente, nos mester hopi cos. Fundacion Funari ta duna servicio pa 45 aña y un di e strugglenan na Aruba ta personanan pa mas power riba veld, mas material y e material den e parti di ehercicio ta hopi importante, pasobra esaki, door di entrena e cliente constantemente e no ta bay depende di otro persona, pasobra e ta un terapia cu ta constante, bo no por par’e, bo tin cu sigui”, señora Rasmijn a splica.

E meta di e evento aki ta:

1. Funari su propio rolstoel pa laman. Esaki ta pa asisti e persona cu tin un dificultad di movecion pa drenta laman.
2. Un Scifit pa Funari. Esaki ta un machine cu ta bira accesibel pa rolstoel pa haci terapia. E machine aki ta traha na un manera cu por desconecta e stul for di e machine pa un rolstoel fit den dje pa haci movecion di man y pia pareu y ora un otro persona kier uz'e cu no ta den rolstoel por conecta e stoel bek na e machine pa e wordo usa.