FPNC ta bezig colectando material pa 'back to school' cu ayuda di comunidad y comercio

Gabriel Marchena, Trahado Social, ta splica:

*Tin registra 375 mucha pero por yega te 500! 

ORANJESTAD (AAN) – Gabriel Marchena, Trahado Social di Fundacion pa Nos Comunidad (FPNC), den entrevista cu DIARIO a bisa cu e accion pa colecta material escolar, ta bayendo hopi bon. Nan kier yuda te awor 375 mucha, pero ta premira cu lo yega un cifra di 500.

            FPNC ta hayando bon cooperacion di e Comunidad di Aruba, pero tambe di comerciantenan cu normalmente ta conoci caba cu e proyecto, ta dunando nan contribucion y e fundacion ta hopi contento con e ta bayendo.

            Marchena a duna di conoce cu te aworaki tin 375 mucha registra, pero ta premira cu lo yega un cantidad di 500, cu no ta un cifra cu nan nunca nan a yega, nan a yega esaki caba den pasado.

            Fundacion pa nos Comunidad tin 14 aña caba realizando e labor boluntario aki. “Esey ta haci cu e ta un proyecto conoci caba den comunidad, y cada bez cu yega e temporada di ‘back to school’ e mayornan ta acerca nos, den e caso aki, pa registra pa e proyecto”, Gabriel Marchena a señala.

            El a agrega cu tin mayornan ta puntra si por yuda cu maletin, pues esaki tambe ta bon bini, y tur locual comunidad por yuda cu ne, manera uniform cu ta den bon condicion por trece na e fundacion.

“Bon condicion kiermen cu e no ta mancha, kibra of cu no tin un defecto na dje cu un mucha no por uza”, Marchena a indica.

            “Jeans tambe ta necesario, short di gym, cu ta algo cu muchanan ta pidi p’e y asina cu nos haya nos ta entrega na e mucha cu tin mester di dje”, el a menciona.

            Gabriel Marchena a bisa cu e articulonan por ta nobo di segunda mano, reiterando si, cu mester ta den bon condicion, teniendo na cuenta cu e mester ta representabel.

            FPNC ta busca uniform di tur scol cuminzando di kleuterschool te Colegio EPI, si un hoben di Universidad tambe mester di uniform tambe por yud’e. Nan tin caba algun di Colegio Arubano, Cacique Macuarima, entre otro. “Si tin mas mayor cu kier haci un contribucion por pasa na e fundacion mes, cu ta situa na Modanza-4, por entrega personalmente na oficina. En caso cu no ta logra por tuma contacto y nos mes ta busca esaki.

              Hopi importante ta cu ta un proyecto unda e mayor tin cu registra pa ricibi e donacion. E tin un ‘screening process’ su tras. Esey kiermen cu nos ta wak tambe e gastonan di cas, mayor su entrada, e payslip, y gastonan manera awa, coriente, huur y tur loke mensualmente nan ta paga riba dje. Pa di e forma aki nos por evalua y defini na final cu e peticion ta wordo aproba”, Gabriel Marchena, Trahado Social di FPNC, a señala.