Basta droga a keda confisca y un arma di candela
ORANJESTAD (AAN): Diabierna mainta un mama S.S. di 65 aña cu su yiu muher S.S.A. di 30 aña, y e yiu homber S.J.A. di 31 aña a presenta dilanti Hues pa tratamento di un caso di bendemento di droga . Ta asina cu na Maart 2022, Polis a haci investigacion na un cas na Rooi Koochi y na Sero Alejandro caminda a haya basta droga y un arma di candela.
Yiu muher kier tuma tur culpa: Segun S.S.A., e tabata esun cu ta bende y ta worde yama Chichimona. El a para riba cu e tabata bende y su ruman y su mama no ta bende.
Hues a bisa cu segun agentenan e mama S.S. a bisa cu e ta worde yama Chichimona y cu e tabata bende pero a stop. Hues a confronta S.S.A. cu su mama ta bisa cu yiu S.S.A. tabata bende pa 6 aña mientras cu S.S.A. ta bisa cu den e periodo di Pandemia di Covid-19 e tabata bende mas o menos 1 aña y 6 luna.
Droga y arma haya den cas: Hues a mustra cu na e cas na Rooi Koochi, unda S.S.A. ta biba, a haya arma di candela, balansa, placa den diferente pochi, pilder XTC. En total a haya 13 gram di cocaina y 18 gram di marihuana.
Segun S.S.A. eynan e tabata prepara e droganan pa e bende na cas di su mama na Sero Alejandro. Ta asina cu S.S.A. tin 4 yiu menor di edad y tabata cobra Onderstand y bende Snackbox.
Fiscal a baha pisa: Fiscal a bisa cu e ta haya legalmente proba cu e trio aki tabata bende. El a cuminsa cu S.S.A., caminda el a bisa cu dia 16 Maart 2019, S.S.A. a destrui windshield patras di auto di un persona.
Tambe 1 Mei 2019, S.S.A. a maltrata un dama door di dal’e cu mokete y ranca su cabey.
Exigi 3 aña di prison pa yiu muher: Fiscal a bisa cu e ta haya legalmente proba e bendemento di cocaina, marihuana, ecstasy (XTC). Tambe cu a haya un arma di candela den lachi di cashi cerca S.S.A. Fiscal a mustra cu S.S.A. mes a bisa cu e tin un arma pa defensa propio door cu el a worde atraca na December 2020.
Fiscal a sigui bisa cu Polis a haya na e apartamento di S.S.A. na Rooi Koochi, 13.4 gram di cocaina, 18.7 gram di marihuana, 2 pilder di XTC y na e cas na Sero Alejandro a haya 131 gram di cocaina, 980 gram di marihuana.
Pa loke ta e periodo di bende, Fiscal a bisa cu S.S.A. ta insisti cu ta durante 1 aña y 6 luna, tempo di Covid, e tabata bende. Fiscal a bisa cu e mesun mama S.S. a bisa na Polis cu su yiu S.S.A. tin 6 aña ta bende. E ruman muher di S.S.A. a declara cu S.S.A. tin 8 aña ta bende.
Diferente comprador di droga a bisa entre 3 y 10 aña a cumpra for di S.S.A. Fiscal a mustra cu S.S.A. mes a bisa Polis cu e tin 7 pa 8 aña ta bende. Tres aña na Rooi Cochi y promer cu esey na su mama S.S. na Sero Alejandro. Pa cu e periodo Fiscal a conclui cu e ta 6 aña. El a exigi 6 aña di prison y placanan haya lo keda confisca.
Exigi 10 aña di prison pa e mama: Fiscal a sigui bisa cu e mama S.S. tambe ta worde acusa di bende. Na e cas na Sero Alejandro a haya 131 gram di cocaina y 980 gram di marihuana. S.S. a declara cu e tin 20 aña ta bende pero no constant. El a bisa cu ultimo tempo e no ta bende mas sino su yiunan S.S.A. y S.J.A. El a bisa cu e yiu homber S.J.A., tin 3 aña ta bende.
Fiscal a bisa cu tin diferente testigo a bisa cu a cumpra 10, 12, 15 aña for di e mama S.S. kende ta worde yama Chichimona. Fiscal a conclui cu S.S. tabata bende pa 10 aña. Fiscal a bisa cu bendemento di droga ta causa hopi tristeza den famianan. El a exigi 10 aña di prison.
Exigi 3 aña di prison pa yiu homber: Fiscal a bisa cu e yiu homber S.J.A. tabata den exterior ora Polis a haci investigacion. E tambe ta worde acusa di bendemento di droga. Fiscal a mustra riba declaracion di e mama S.S., kende a bisa cu su yiu homber S.J.A. ta bende pa 3 aña. Tambe cu e ruman muher S.S.A. a bisa cu el a haya sa 2 aña pasa, cu su ruman homber S.J.A. ta bende.
Ademas tin testigonan ta bisa cu entre 2, 3, 8, 10, 12 y 15 aña a cumpra for di S.J.A. Fiscal a conclui cu e periodo di bendemento ta 3 aña. El a exigi 3 aña di prison pa S.J.A. y e mas cu 7 mil Florin cu a haya lo keda confisca.
Defensa di Abogado: Abogado mr. D.Croes a bisa cu S.S.A. a admiti di tabata bende droga y cu e arma ta di dje for di principio. E unico discusion tin ta e periodo cu e lo tabata bende. El a bisa cu ora cu el a papia cu S.S.A. tocante e periodo, S.S.A. a bisa cu el a bisa cu e tabata biba un periodo di 8 aña.
El a bisa cu ta durante e periodo di Covid el a bende droga pa sobrevivi cu su 4 yiunan. E abogado a bisa Hues cu e bendemento di droga ta un fayo cu S.S.A. a haci. E abogado a bisa cu e ta haya cu declaracion di e testigonan ta dudoso.
El a mustra cu un ruman muher a bisa cu e tin hopi tempo no ta bay cerca su ruman pasobra e no ta bon cu e famia. E abogado ta haya cu con e ruman ta bisa cu S.S.A. tabata bende siendo cu e no ta bay eynan.
S.S.A. den su otro declaracionnan el a pone enfasis cu no a bende asina largo sino durante 1 aña y 6 luna. El a pidi Hues pa tene cuenta cu S.S.A. tin 30 aña y 4 yiu menor di edad. Ta promer biaha cu el a cay sera. E abogado a bisa cu Polis a confisca u tas cu 2 mil Florin, prendanan di oro. El a puntra si por haya esakinan back.
Abogado mr. Illes di S.S. y S.J.A. a bisa cu e ta uni cu mr. Croes, e declaracion di e testigonan ta dudoso. E abogado a bisa cu tur dos a reconoce di tabata bende. E discusion ta riba e periodo. S.J.A. a bisa cu e tin algun luna ta bende. Su mama S.S. a bisa tambe cu S.J.A. a cuminsa bende pa algun luna. E ta kere cu mester pone un periodo mas cortico cu Fiscal a pone.
El a bisa cu S.S. a bisa cu el a cuminsa 20 aña pasa y no constant y no ta bende mas. E ta laga na opinion di Hues pa dicidi. E abogado a pidi pa S.S. haya back e cadena y renchi di oro cu a keda confisca.
Huez a cera tratamento di e caso, y a bisa cu Diabierna 2 di December mainta e lo dicta sentencia.
