Fiesta di Cunucu 2026 lo bira atrobe un celebracion pa nos grandinan

Minister Geoffrey Wever:

ORANJESTAD (AAN):  Diaranson mainta Minister di Finansa, Asuntonan Economico y Sector Primario, mr. Geoffrey Wever hunto cu Minister di Salubridad, Asuntonan Social, Cuido di Adulto Mayor y Maneho di Adiccion sra. Mervin Wyatt-Ras a anuncia oficialmente e di dos edicion di Fiesta di Cunucu. E evento lo tuma lugar diadomingo 28 di juni na Santa Rosa.

E celebracion ta un iniciativa di colaboracion entre dos ministerio, Directie Ouderenzorgen y Departamento di Santa Rosa, cu e obhetivo di honra nos adultonan mayor y promove e rikesanan di nos sector primario. 

Fiesta di Cunucu ta un dia yena di cuminda crioyo, productonan local fresco, ambiente autentico di cunucu y actividadnan cu stimula alegria, movemento y contacto entre generacionnan. E evento ta combina e mision di Sector Primario pa fortalece produccion local cu e mision di Cuido di Adulto Mayor pa promove bienestar, actividadnan y sentido di comunidad pa nos grandinan. Union ta haci forsa. E dos ministerio ta uni forsa pa crea un dia di encuentro genuino entre nos comunidad y nos herencia agricola. 

"E Fiesta di Cunucu ta un muestra di loke ta posibel ora dos ministerio traha hunto cu un vision comparti. Nos ta celebra nos grandinan, nos cuminda y nos tradicion — y nos ta haci esey den e lugar mas apropia pa haci esaki cu ta nos cunucu," Minister Geoffrey Wever a comenta. 

Tur famia di Aruba ta keda invita pa bin bishita Santa Rosa diadomingo 28 di juni. E Fiesta di Cunucu ta mas cu un evento, e ta un acto di gratitud, respet y orguyo Arubiano.