Director di Biblioteca Nacional Astrid Britten: --- ORANJESTAD (AAN) -- Den conferencia di prensa Diabierna, Biblioteca Nacional Aruba a anuncia e Festival di Buki di Mucha 2021 y a introduci e nomber di e tema di e aña aki: “Bira loke bo kier”.
A hiba palabra director di BNA señora Astrid Britten, Zetsia Ponson, encarga cu e apertura di e festival y “Informatie Specialist”, Valerie Figaroa, encarga cu e clausura y Ruth Gaanie, Encarga cu e cantica di e Festival di Buki.
Director di Biblioteca Astrid Britten a menciona cu e buki “Bira loke bo kier” ta un contribucion di diferente autor y ilustrador.
Britten a enfoca riba dos persona, cu ta Loretta Boekhoudt, ken a skirbi den e buki aki y ken nan ta yama “nos propio Ronny Solognier”, cu ta un di e ilustradornan di e buki aki.
E buki aki ta dedica na Nathalie Abigail Croes, cu pa hopi aña tabata encarga cu e apertura di e Festival di Buki, pero e no tey mas, ta den feliz memoria. Britten a expresa cu esaki ta un momento oportuno pa dedica e buki aki na dje.
Astrid Britten a agrega cu Diabierna 5 di November lo tin apertura di e di 29 Festival di Buki pa Mucha, via Tele Aruba, pa 7 or di anochi. Otro aña lo ta celebrando e di 30 edicion di e Festival di Buki pa Mucha, y tur cu e meta principal di promocion di lesamento.
“Nos ta keda kere den esey, y nos ta inculca den e muchanan e amor y e pasion cu nan por tin, pa cu lesamento. Durante di e dianan aki tur scol ta buscando nan material pa nan tin nan cla. Pues, e bukinan a yega cu nan por distribui nan den tur scolnan. Nos tin participacion di scolnan preparatorio, tur scol basico, y tambe scol special”, Astrid Britten a subraya.
Seguidamente, el a pasa palabra pa Zetsia Ponson, cu e aña aki lo ta encarga cu e apertura di e Festival di Buki pa Mucha.
Ponson a menciona cu e aña aki e festival di buki ta sigui e trend di innovacion, y e ta bay virtual. El a duna di conoce cu Biblioteca a prepara un show masha colorido, yen di musica y contamento di cuenta. Lo tin e Leerorkest di Aruba cu lo participa, pa cual e dama a gradici sr. Johnny Croes. Tambe lo tin Payaso Lalali cu ta bin conta storia hunto cu su amigo Bruce, cu ta un pisca. James Ocaya acompaña pa su yiu homber chikito, cu ta bay duna un muestra con pa planta un mata. Tambe tin e grupo di baile di e docente di scol Princess Amalia, de Jong. Hunto nan a entrena pa tres dia y a pone un bunita show den otro, special pa e apertura.
Minister Presidente lo hiba un discurso di apertura pa yama bon bini na e Festival di Buki pa Mucha, y tambe Minister di Enseñanza y Deporte lo hiba palabra.
