ORANJESTAD (AAN): Durante e conferencia di prensa cu Colegio di Dupervision Caft a tene Diabierna, presidente Raymond Gradus a indica cu Aruba ta para dilanti di un gran reto pa reduci e debe publico y logra hib’e na un nivel sostenibel mas pronto posibel.
“ Aruba mester realisa un surplus mas pronto posibel, ya cu esey ta e unico manera pa reduci e debe nominal y e gastonan di interes relaciona cu ne”.
Asina, por ehempel, Aruba ta paga aworaki 5% di e PIB na interes pa aña.
Esaki ta bay a costo di otro gasto riba presupuesto, manera gasto di enseñanza of pa combatimento di pobreza. Ademas CAft ta enfatisa e importancia di realisa for di 2023 un surplus di financiamento di 1%, segun Gradus.
E presidente a indica tambe cu e reformanan, manera acorda den e pakete di medida pa Pais Aruba (landspakket), ta esencial pa impulsa crecemento economico.
Mester reduci e gastonan di actividad empresarial y e gastonan administrativo. Un reforma fiscal integral cu enfasis riba simplificacion ta importante.
Acumulacion di legislacion a crea un sistema compleho cu un gran cantidad di gasto deducibel, exencion y excepcion. Esaki ta aumenta e carga administrativo pa e dunadonan di trabou y pa Servicio di Impuesto y ta dificulta simplificacion y automatisacion.
“Digitalisacion y intercambio di dato entre e diferente servicionan di Gobierno lo reforza e capacidad di actuacion di Servicio di Impuesto y, consecuentemente, lo aumenta cumplimento di obligacion”.
Tambe reforma den seguridad social y cuido ta necesario pa garantiza sostenibilidad di e sistema aki”, Gradus a indica.
El a bisa tambe cu ta di sumo importancia pa introduci na termino cortico economizacion den e sistema di cuido di AZV como prome paso dirigi riba cuido sostenibel.
