ORANJESTAD (AAN): Señor Randolf Vrolijk di Fundacion Enseñansa pa Aruba (FEPA) a indica cu FEPA a caba di traduci e buki di docter Spencer Johnson,
‘Who moved my cheese’ na Papiamento. ‘Ken a move mi keshi’ ta e titulo na Papiamento.
‘Who moved my cheese’ ta un buki di motivacion cu ta conta e storia di cuater personahe (dos raton y dos humano chikito) den un laberinto cu ta busca keshi, cu ta representa felicidad y exito. E ta siña con pa adapta na cambio, pa laga miedo los y acepta oportunidad nobo.
Cu e buki ‘Ken a move mi keshi’, FEPA ta cuminsa un campaña pa asina haya mas hende posibel cu a bandona enseñansa (dropouts) cu kier sigui un of otro estudio. Tambe e intencion cu e buki ta pa duna aporte na scolnan cu e posibilidad pa mehora calidad di enseñansa caminda cu esaki no ta bay bon.
Señor Vrolijk a duna di conoce cu na Aruba mas y mas hende kier sigui studia y FEPA a difersifica y a trece estudio y cursonan cu no tawata existi na Aruba cu a pone tambe cu e interes pa tuma y sigui cursonan di FEPA a crece enormemente.
FEPA ta un institucion di enseñansa cu no ta ricibi subsidio y ta draai loke cu comunidad ta trece aden y esaki ta bay bek den comunidad sea den estudio como tambe mas o menos un 20% di entrada ta bay pa cierto centronan di adiccion den comunidad. Tambe FEPA ta yuda personanan den comunidad cu no tin suficiente entrada.
Cu e campaña aki, FEPA ta spera cu mas dropouts por sigui estudionan durante anochi pa haya miho oportunidadnan di trabou y consecuentemente drecha nan calidad di bida, cu ta un meta principal tambe di FEPA.
