FCCA ta expresa su gran orguyo y compromiso cu e proyecto ‘E Porta pa Harmonia’

*Un iniciativa cu ta lanta speransa y union den comunidad

ORANJESTAD (AAN): Durante e presentacion di e proyecto di Scol di Musica “E Porta di Harmonia”, Maroushka Rafini, beleidsmedewerker di FCCA, a expresa cu nan ta carga e proyecto cu hopi placer.

Pa algun aña caba, FCCA no a haya e oportunidad pa traha casnan nobo y FCCA ta anhela pa pronto por traha casnan y crea barionan pa trece comunidadnan hunto.

E proyecto aki ta un stap grandi den e maneho nobo pa crea infrastuctura pa haci barionan social completo. Den e caso aki a cuminsa cu un cas bandona di FCCA y lo transforma esaki den un scol di musica di bario, cual plan ta conta cu sosten di FCCA. 

E idea pa e proyecto a nace durante un bishita recient di Prome Minister Mike Eman na e bario, ora cu su bista a cay riba e parcela y e necesidad pa mas union den comunidad a bira cla. E momento ey mes a planta e simia pa un idea cu awe ta bira realidad. 

E cas den Semeleerstraat tabata ideal pa e iniciativa: un espacio cu por transforma cu e meta pa yuda e bario crece, trece musica, oportunidad y cultura bek den comunidad.

FCCA no a duda ni un momento pa forma parti di e proyecto, mustrando asina su compromiso firme pa yuda Aruba crece di manera sostenibel y inclusivo. 

Ta importante pa kere den talento di e pueblo di Noord, Piedra Plat, Savaneta y den tur bario di Aruba. Aruba tin suficiente talento den arte, deporte, cultura, musica etc, y unda cu un hoben por desaroya y eleva su mes, lo por conta cu e sosten FCCA. 

‘E Porta pa Harmonia’ ta mas cu solamente un scol di musica. Ta un simbolo di speransa, union y progreso. FCCA ta invita tur ciudadano pa sostene e esfuerso aki y yuda forma un futuro caminda cultura y comunidad ta bay man den man.