Famia Planea conhuntamente cu instancia internacional a realisa investigacion riba tereno di educacion sexual

Evelyn Ras-Yarzagaray ta splica:

ORANJESTAD (AAN):  Evelyn  Ras - Yarzagaray, Directora di Fundacion Famia Planea Aruba a laga sa cu a logra un proyecto riba cual ta trahando for di aña pasa riba dje. Ta un proyecto internacional cu ta haciendo hunto cu nan partner cu ta 'International Planned Parenthood Federation' (IPPF) cu tin base na Inglatera.

            Asina a bin den contacto cu 'Open University' cu tambe ta na Inglatera cu tabata tin interes pa nan studiantenan por haci un investigacion den e area di educacion sexual.

            Di e manera aki, Fundacion Famia Planea Aruba a wordo escogi como isla den Caribe. Esaki sigur a cay den bon tera cerca nan y asina a yega na un acuerdo pa traha conhuntamente cu e universidad aki y realisa e proyecto aki tambe den transcurso di aña 2023.

            Tur plan a wordo haci aña pasa y asina a bin den contacto tambe cu Colegio San Antonio pa wak si nan kier a bira parti di e proyecto, Ras-Yarzagaray a indica.

            Esaki ta un colaboracion internacional pero pa FPA a reenforsa nan trabao cu tin cu Colegio San Antonio. Di e forma aki a yega na e parti di educacion sexual. El a sali di hoben pa hoben. E persona encarga cu e investigacion a bin Aruba na Januari pa asina cuminsa cu su sesionnan na Colegio San Antonio cu 12 studiante.

            Esaki a culmina un siman y mey pasa. A presenta e resultadonan cu tabata tin pa asina esaki keda den man di FPA. Con lo uza esaki ta algo cu ta analisando aworaki pa asina por bay wak si den periodo di carnaval por reenforsa locual ya caba e fundacion ta duna, a bisa.

            E directora di Famia Planea a agrega cu e datonan cu a wordo compila riba plataforma internacional tambe ta bay wordo comparti no solamente cu 'Internacional Planned Parenthood Federation', pero tambe na tur e 140 pais cu ta forma parti di e federacion aki, specificamente den Caribe y Latinoamerica pa nan por wak kico Aruba ta haciendo pa e area aki y con por haci mas colaboracionnan den futuro pa por sigui progresa pa cu educacion sexual brinda na e hobennan, a splica.

            Pa e fundacion ta un proyecto completamente nobo. Nan tambe a siña masha hopi mes di dje. E no a finalisa ainda pasobra ainda tur e datonan di e investigacion ta bay wordo presenta entre Augustus cu November y asina riba un plataforma internacional  e scol por bay present'e cu diferente otro paisnan. 

            Famia Planea Aruba ta hopi satisfecho riba con e proyecto aki a bay ya cu e ta laga nan crece como organisacion chikito.